Ulttyq holdıngter men kompanııalar boıynsha 163 aktıv básekelestik ortaǵa beriletin bolady
ASTANA. QazAqparat - Qazaqstanda ulttyq kompanııalardyń 60 enshiles uıymyn jabý usynyldy. Bul týraly búgin Ortalyq kommýnıkatsııalar qyzmetindegi brıfıngte QR Ekonomıka jáne bıýdjettik josparlaý mınıstri Erbolat Dosaev málim etti.
«Ulttyq holdıngter men kompanııalar boıynsha 163 aktıv básekelestik ortaǵa beriletin bolady, onyń ishinde «Samuryq-Qazyna» qory boıynsha - 106, «Báıterek» holdıngi boıynsha - 15, «QazAgro» - 32, «Parasat» - 8, sondaı-aq «Zerdeniń» 2 aktıvi berilmek. Sonymen birge 60 kompanııany jabý, ulttyq holdıngter qurylymyna kiretin 28 uıymdy birigý jolymen qaıta qurý usynyldy»,-dedi E. Dosaev.
E. Dosaevtyń aıtýynsha, osynda qaıta qurylymdaý nátıjesinde ulttyq holdıngter kompanııalarynyń sany 36 paıyzǵa (270 uıym) qysqaryp, barlyǵy 464 uıymdy quraıtyn bolady.
Básekeles ortaǵa berýge usynylǵandardyń ishinde mynadaı «Maıqaıyńaltyn» AQ, «Qazaqstandyq vagon quraıtyn kompanııa» JShS, «Transtelekom» AQ, «Qasqor-Transservıs» AQ, «Temirjoljóndeý» JShS, «Qyzyltý» JShS, «Jambyldyq GRES» AQ, QBTÝ jáne basqa iri uıymdar kirdi.
Esterińizge sala keteıik, Memleket basshysy byltyrǵy jyldyń 11 qazanynda keńeıtilgen Úkimet otyrysynda jekeshelendirýdiń ekinshi tolqynynda kásiporyndar sanyn ulǵaıtýdy qamtamasyz etýdi tapsyrǵan bolatyn.
