Ulttyq ǵylym akademııasynyń mártebesi qaıtarylady – Saıasat Nurbek

NUR-SULTAN. QazAqparat – QR Ǵylym jáne joǵary bilim mınıstri Saıasat Nurbek jańa mınıstrliktiń negizgi jumys baǵyttaryn atady, dep habarlaıdy QazAqparat tilshisi.

Onyń aıtýynsha, ǵylym salasyndaǵy negizgi mindetterdi Memleket basshysy Qasym-Jomart Toqaev Almatyǵa sapary kezinde Ulttyq ǵylym akademııasynda aıtqan.

«Birinshisi – Ulttyq ǵylym akademııasynyń mártebesin qaıtarý jáne nyǵaıtý, bul jumyspen belsendi aınalysyp jatyrmyz. Tıisti zań jobasy ázirlený ústinde. Ekinshi úlken baǵyt – ýnıversıtet pen JOO-daǵy ǵylym. Qazir ókinishke qaraı, ýnıversıtet ǵylymy negizgi ǵylym bola almady, irgeli, qoldanbaly ǵylymdy qorektendiretin alańǵa aınalmady. Bul jerde de bar kúsh-jigerimizdi salamyz», - dedi Saıasat Nurbek Úkimet otyrysynan keıin jýrnalısterge bergen suhbatynda.

Sonymen birge, vedomstvo qyzmetiniń taǵy bir mańyzdy baǵyty – ǵylymı-zertteý jáne tájirıbelik-konstrýktorlyq ázirlemelerdi nemese qoldanbaly zertteýlerdi qoldaý jáne qarjylandyrý.

«Bul jerde bizdiń mınıstrlik pysyqtap jatqan birneshe júıeli sharalar bar jáne jaqyn arada osynyń barlyǵyn ashyq talqylaıtyn bolamyz. Biz ózimizdiń ǵylymı qaýymdastyǵymyzdan, negizgi JOO-nyń professorlyq-oqytýshylyq quramynan bazalyq tehnıkalyq tapsyrma alamyz», - dedi S. Nurbek.

Buǵan deıin Saıasat Nurbek mınıstr laýazymyna óziniń quzireti týraly suraqtarǵa jaýap bergen edi.

Sonymen birge, Saıasat Nurbek Ashat Aımaǵambetovtyń sapasyz bilim beretin joǵarǵy oqý oryndarynan tazalaý jumysy jalǵasatynyn aıtty.

Foto: spubl.kz