Ulttyq gvardııa polkovnıgi ushaqta jolaýshynyń ómirin saqtap qaldy
ASTANA. QazAqparat - Ulttyq gvardııa polkovnıgi Serik Omarbaev Astana-Dýbaı reısiniń ushaq bortynda jolaýshy áıeldiń ómirin saqtap qaldy, dep habarlaıdy QazAqparat Ulttyq gvardııanyń baspasóz qyzmetine silteme jasap.
Polkovnık Serik Omarbaevtyń aıtýynsha, Astanadan Dýbaıǵa ushyp bara jatqan ushaqta jolaýshylardyń biri esinen tanyp qalǵan.
«Ol kezde tún ortasy bolǵandyqtan, jolaýshylardyń kóbi uıqyda edi. Kómekke shaqyrǵan daýysty estip, jetip barsam, áıel klınıkalyq ólim jaǵdaıyna túsip úlgergen eken. Abyroı bolǵanda, bortta alǵashqy medıtsınalyq kómek kórsetýge qajettiniń bári bar eken. Jarty saǵattaı arpalystan soń áıel es jıdy. Dýbaıǵa jetken soń ony áýejaıda kútip turǵan kardıologııalyq brıgadaǵa tapsyrdyq», - deıdi polkovnık.
Ushaqtaǵy jaǵdaıdyń shekteýli bolýyna qaramastan, ofıtser áıelge jasandy jolmen tynys berip, júrek tusyna massaj jasaý arqyly aman saqtap qaldy.
«Mundaı kezderde alǵashqy medıtsınalyq kómek kórsetý barshamyzdyń, ásirese aq jeleńdi jandar men pogon taqqan myna bizderdiń boryshymyz. Mundaı jaǵdaı meniń ómirimde alǵash ret bolyp otyr. Áıeldiń esin jınaýy úshin qolymnan kelgenniń bárin jasadym», - deıdi Serik Omarbaev.
Dárigerler naýqastyń júreginde týa bitken aqaýy bar ekenin anyqtady. Qazir onyń ómirine qaýip tónip turǵan joq.
«Eger laınerdiń bortynda ol bolmaǵanda, meniń halim ne bolaryn bilmeımin. Ol naǵyz kásibı maman, sergek, qaıyrymdy, kishipeıil jan, baýyrmal dáriger», - dep alǵys bildirdi Natalıa Popova.
