Ulttyq geologııalyq qyzmet qurylady -Joldaý
QR Prezıdenti Qasym-Jomart Toqaev Qazaqstan halqyna kezekti Joldaýynda osylaı málim etti.
«Ónerkásiptik saıasat týraly daıyndalyp jatqan zań qaıta óńdeý salasynyń aldynda turǵan suraqtarǵa jaýap berýi tıis. Onyń biri – shıkizatqa qoljetimdilik máselesi. Qarapaıym ǵana ereje qabyldaý kerek bolyp tur. Otandyq ónerkásip úshin shıkizat taýarlarynyń baǵasy qoljetimdi, kólemi jetkilikti bolýy qajet. Jyl aıaǵyna deıin Úkimet osy mańyzdy mindettiń ońtaıly sheshimin tabýy kerek», - degen Memleket basshysy bul iste elimizdiń geologııalyq áleýeti tolyqtaı ashylmaı jatqanyn eskertti.
«Geologııalyq zerttelý deńgeıi tómen bolyp qalýda. Investorlardyń sapaly geologııalyq aqparattarǵa qoljetimdiligin qamtamasyz etý qajet. Onyń ishinde túrli baǵynysty uıymdardyń bazasynda tıimdi ulttyq geologııalyq qyzmet qurylýy tıis. Bul uıym jer qoınaýyna kimdi jáne qalaı jiberý kerektigin sheshetin monopolıst bolmaýy kerek. Onyń róli ınvestorlardy keshendi servıstik qoldaýǵa baǵyttalǵany jón», - dedi Qasym-Jomart Toqaev.
Sondaı-aq, Prezıdent artyq aqsha massasyn retteý joldaryn atady.
«Jalpy kólemi 6,3 trln teńgeni quraǵan daǵdarysqa qarsy sharalardyń nátıjesinde ekonomıkada shekten tys aqsha massasy qalyptasty. Biraq osy qarjy jetpeı jatqan salalar bar. Ekinshi deńgeıli bankter shaǵyn sharalarǵa, ásirese, aýyldarda aqsha salmaıdy. Sondyqtan mıkroqarjylyq uıymdardyń áleýetin iske qosý qajet. Olar jergilikti oryndarda jumys istep júrgendikten, ondaǵy klıentterdi, olardyń bıznesin, múmkindikterin jaqsy biledi. Ulttyq bank pen Qarjy naryǵyn retteý jáne damytý agenttigi osy másele boıynsha sheshimder paketin daıyndaýy tıis», - dedi Prezıdent.
