Ulttyq ǵarysh ortalyǵy alǵashqy ǵımaratynyń qurylysy kelesi aıda aıaqtalady
ASTANA. QazAqparat - Astanada salynyp jatqan ulttyq ǵarysh ortalyǵynyń alǵashqy ǵımaratynyń qurylysy kelesi aıda aıaqtalady. Bul týraly búgin Májiliste Qazaqstanda ǵarysh salasyn qalyptastyrý taqyrybyndaǵy Úkimet saǵatynda QR Ulttyq ǵarysh agenttiginiń tóraǵasy Talǵat Musabaev málimdedi.
«Ortalyqta Jerdi qashyqtyqtan zondtaý ǵaryshtyq júıesiniń jerústi segmenti ornalasady. Bul arqyly Jerdi qashyqtyqtan zondtaý spýtnıkteri basqarylady jáne osy spýtnıkterden alynǵan málimetter óńdeledi», - dedi T. Musabaev. Onyń sózine qaraǵanda, Qazaqstan men Frantsııa arasyndaǵy kelisimsharttar aıasynda Jerdi zondtaý ǵaryshtyq júıesin qurý boıynsha 45 qazaqstandyq ınjener-maman Frantsııa men Italııadan tolyq kýrstyq taǵylymdamadan ótken. Olar ǵarysh apparattaryn basqarýmen, jobalaýmen, málimetterdi alýdy qamtamasyz etýmen jáne alynǵan málimetterdi óńdeýmen aınalysady. «Osylaısha, ózimizdiń ǵarysh apparattarynyń bolýy, sonymen qatar, olardan alynǵan málimetterdi ózderimizdiń bilikti mamandardyń óńdep, kádege jaratýy álemdik naryqtaǵy osyndaı ónimder úshin jumsalatyn qarajatty eki esege tómendetýge múmkindik beredi. Al Jerdi qashyqtyqtan zondtaý ǵaryshtyq júıesi Qazaqstannyń eksporttyq áleýetin jylyna 6,5 mıllıard teńgege arttyrady. Bizdiń aldaǵy mindetimiz osy júıeniń tıimdiligin arttyrý», - dedi agenttik basshysy.
