Ulttyq fýtbol lıgasynyń Kýbogy taǵaıyndaldy
ALMATY. Jeltoqsannyń 29-y. QazAqparat /Erlik Erjanuly/ - Búgin Almatyda Qazaqstan fýtbol federatsııasynyń atqarýshy komıtetiniń májilisi ótti. Onda 2010 jylǵy fýtbol jarystarynyń reglamentine ózgerister men tolyqtyrýlar engizildi,
dep habarlaıdy QazAqparat QFF-nyń ınternettegi saıtyna silteme jasap.
Bul alqaly jıynda komıtet sheshimimen Premer-Lıga klýbtarynyń qosalqy quramdary arasyndaǵy týrnır pishini eki aınalym boıynsha ótetin boldy. Premer-Lıganyń qosalqy quramdary arasynda sondaı-aq, Ulttyq fýtbol lıgasy Kýbogy taǵaıyndaldy. Oǵan qosalqy quram komandalarynyń báriniń qatysýy mindetti bolmaq. Qazaqstan fýtbol federatsııasy atqarý komıtetiniń vıtse-prezıdenti, Ulttyq fýtbol lıgasynyń dırektory Seıildá Baıshaqovtyń aıtýynsha, qosalqy quramdardyń matchy qalyptasqan dástúr boıynsha komandalardyń negizgi quramdarynyń kezdesýi qarsańynda ótedi. Chempıonattyń ekinshi kezeńinde negizgi quramdary týrnır kestesindegi óz oıyndary boıynsha altylyqqa bólinge kezde, osy toptarda alǵan oryndarǵa qaramastan qosalqy quramdar da ózara saıys ótkizedi. Eki aınalymdyq kezdesýden keıin top úzdikteri UFL Kýbogyn sarapqa salatyn bolady. Sonyń nátıjesinde elde taǵy bir jastar týrnıri paıda bolmaq. Qosalqy quram fýtbolshylarynyń jasyna (21 jasqa deıin) qoıylatyn shekteý aldaǵy ýaqytta saqtalady. Onda Lıga keńesiniń usynysy boıynsha Qazaqstan chempıonatyna qatysatyn Premer-Lıga klýbtarynyń legıoner-fýtbolshylarynyń jasyn shekteý tártibi de qaıta qaraldy. Komıtet sheshimi boıynsha 30 jastyq shekteý óz elderiniń ulttyq quramalary sapynda 2010 jylǵy Álem chempıonatynyń 2008 jáne 2009 jylǵy irikteý týrnırine qatysqan fýtbolshylarǵa qoldanylmaıdy.
