Ulttyq eksporttyq strategııa ázirleý jumystary qolǵa alynady
ASTANA. QazAqparat - Ulttyq ekonomıka mınıstri Tımýr Súleımenovtiń tóraǵalyǵymen Memleket basshysynyń «Qazaqstannyń úshinshi jańǵyrtylýy: jahandyq básekege qabilettilik» atty Qazaqstan halqyna joldaýyn oryndaý boıynsha vedomstvo alqasy ótkizildi, dep habarlaıdy QazAqparat.
Mınıstrlik baspasóz qyzmeti taratqan aqparatqa sáıkes, is-shara aıasynda vıtse-mınıstrler bıýdjettik zańnamany jetildirý, salyq saıasaty jáne memlekettik-jeke áriptestikti damytý salasyndaǵy, sondaı-aq, bıznes-ortany jaqsartý men keńeıtý jáne Ulttyq eksporttyq strategııa boıynsha jumystar týraly baıandady.
Ulttyq ekonomıka vıtse-mınıstri Rýslan Dálenov MJÁ jobalaryn josparlaý rásimdeýlerin jeńildetý úshin qandaı sharalar qabyldanyp jatqanyn jetkizdi. Onyń aıtýynsha, «Baǵdarlamalyq MJÁ» engizý kózdelýde.
«Jeke áriptesti irikteý men MJÁ jobalaryn júzege asyrýdyń barlyq rásimdeýleri árbir sala úshin memlekettik jáne úkimettik baǵdarlamalarda jeńildetilgen túrde qosymsha saraptaýlarsyz tirkeletin bolady», - dedi Dálenov.
Ol sondaı-aq, jańa Salyq kodeksiniń qazirgiden basty aıyrmashylyǵy mátinniń jeńil tilmen jazylýy, kóleńkeli ekonomıkamen kúres jónindegi sharalar, jeńildikter men ýájdeme arqyly qarapaıym ákimshilendirý bolatyndyǵyn atap ótti. Dálenovtiń aıtýynsha, qujatty tamyzda Parlamentke engizý josparlanýda.
Ulttyq ekonomıka vıtse-mınıstri Serik Jumanǵarın bıznesti memleket tarapynan jónsiz retteýdi qysqartý alty basty baǵyt boıynsha josparlanyp jatqanyn baıandady. Onyń ishinde, qysqartý men ońtaılandyrý maqsatymen baqylaý men qadaǵalaý salasyn tekserý júrgiziletin bolady. Kvazımemlekettik sala monopolısteri men sýbektileri beretin aqparattyq quraldar men ruqsattardy reformalaý qarastyryldy, «ózin ózi retteý» ınstıtýtyn damytý men básekelestikke kedergi bolatyn normalardy anyqtaıtyn tekseris josparlanýda, sondaı-aq, bıznes úshin shyǵyndardyń barlyq túrin jappaı azaıtý qarastyryldy.
«Básekelestikke kedergi jasaıtyn normalardy anyqtaý úshin zańǵa qosymsha zańnamalardyń barlyq deńgeıin taldaý júrgiziledi. Bul úshin zańǵa qosymsha zańdyq normatıvtik aktilerdi qaıta qarastyrýdy talap etetin normalardy anyqtaý arqyly tolyq tizbe belgilenedi. Birinshi kezeńde (2017 jylǵy mamyr boıy) 30 zańdy tekserý júrgiziletin bolady», - dedi Jumanǵarın.
Ulttyq ekonomıka vıtse-mınıstri Aıbatyr Jumaǵulov 2018 jylǵy 1 qańtardan bastap, memlekettik bıýdjettiń 4-deńgeıi retinde halyq sany 2 myńnan asatyn aýyldyq okrýgter deńgeıinde, al 2020 jyldan bastap barlyq jerde JÓB bıýdjeti engiziletinin atap ótti.
«Aýyl ákimderi men olardyń apparat qyzmetkerlerin oqytý, JÓB derbes bıýdjeti men kommýnaldyq menshigin engizýge ókiletti organdardyń aqparattyq júıesin, aýyl ákimderi apparattaryn ınternet baılanysymen jáne kompıýterlik quraldarmen qamtamasyz etý boıynsha sharalar qarastyrylady», - dedi Jumaǵulov.
Ulttyq ekonomıka vıtse-mınıstri Ernar Bákenov atap ótkendeı, vedomstvo Ulttyq eksporttyq strategııany ázirleý men qabyldaý jónindegi jumystardy jýyq arada júrgizetin bolady. «Baǵdarlama joǵary turǵan memlekettik josparlaý qujattarynda kórsetilgen («Qazaqstan-2050» Strategııasynda jáne QR 2020 jylǵa deıingi Strategııalyq damý jospary), onyń ishinde 2025 jylǵa qaraı shıki taýarlar eksporty kólemin eki ese ulǵaıtý boıynsha strategııalyq maqsattarǵa qol jetkizýge baǵyttalady», - dedi Bákenov.
Onyń sózine qaraǵanda, strategııa qoldaýdyń barlyq tetikterin júıeleýge, óndirýshilerge olar úshin qandaı qoldaý sharalary qoljetimdi ekenine túbegeıli jaýap berý úshin jasalǵan.
Vedomstvo basshysy alqa otyrysyn qorytyndylaı kelip, mınıstrliktiń aldyna Qazaqstan ekonomıkasyn damytýdyń tabysty sheshilýine yqpal etetin mańyzdy tapsyrmalar qoıylǵanyn atap ótti.
«Bizge zor úmit artylyp otyr, bizdiń aldymyzǵa qoıylǵan mindetterdi birlesip sheshetinimizge senemin», - dedi Súleımenov.
