Ulttyq ekonomıka vıtse-mınıstri saıajaıdy turǵyn úı retinde zańdastyrýǵa qarsy
ASTANA. QazAqparat - Qala syrtyndaǵy saıajaılardy turǵyn úı retinde zańdastyrýǵa bolmaıdy. Bul týraly búgin Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda Ulttyq ekonomıka vıtse-mınıstri Qaıyrbek Óskenbaev málim etti. Eske salaıyq, komıtet otyrysynda «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.
«Depýtattar saıajaılardy turǵyn úı retinde qabyldaý kerek degen usynystar aıtyp otyr. Biz buǵan kelispeımiz. Óıtkeni, eger saıajaılardy turǵyn úı retinde zańdastyratyn bolsaq, onyń basqa ınfraqurylymdaryn - mektep pen aýrýhana sekildilerdiń barlyǵyn qurý qajettigi týyndaıdy. Sosyn saıajaılar alabyndaǵy joldyń keńdigi - bar-joǵy 6 metr. Endeshe, olardy tıisti normalarmen qalaısha qamtamasyz etý kerek? Úılerdiń birqataryn syzyp tastaımyz ba? Al qaısysyn syzaıyq? Oń jaǵyn ba, joq sol jaǵynan ba? Suraq kóp», - dedi vıtse-mınıstr. Onyń aıtýynsha, saıajaılar tóńiregindegi máseleni ornyqty sheshýdiń basqa joldaryn izdestirý kerek.
Budan bólek, vıtse-mınıstr Astana mańyndaǵy kentterdegi úı qurylystarynyń júıesiz salynýyna da qarsylyǵyn tanytty. Onyń sózine qaraǵanda, qala mańynan úı salmas buryn, bas jospardyń bekitilýin kútý kerek, óıtkeni onda jeke jáne kópqabatty turǵyn úıler úshin ýchaskeler kórsetiledi.
