Ulttyq ekonomıka mınıstrligine 50-den astam jańa quzyret berilmek
Qujatta jazylǵandaı, vedomstvoǵa myna quzyretterdi berý josparlanǵan:
- 3 jyldyq kezeńge arnalǵan jalpy sıpattaǵy transfertterdi aıqyndaý kezinde bıýdjettik damý baǵdarlamalary boıynsha shyǵyndardyń boljamdy kólemine ulǵaıtý koeffıtsıentin qoldaný tártibin aıqyndaý;
- nysanaly jarna boıynsha shyǵystardy josparlaý jáne jarnany salýǵa baǵyttalǵan bıýdjettik baǵdarlamany qarjylandyrý qaǵıdalaryn kelisý;
- áleýmettik medıtsınalyq saqtandyrý qoryna transfertter berý qaǵıdalaryn bekitý;
- Qazaqstannyń Damý Bankiniń qarjylyq ornyqtylyq parametrlerin, olardyń shekti mánderin jáne esepteý ádistemesin aıqyndaý;
- eksportty qoldaý boıynsha memlekettik kepildik berý lımıtiniń somasyn belgileý;
- arnaıy komıssııany qalyptastyrý, ol týraly erejeni bekitý;
- halyqaralyq jáne memlekettik uıymdardyń, sheteldik jáne qazaqstandyq úkimettik emes qoǵamdyq uıymdardyń jáne granttar beretin qorlardyń tizbesin bekitý;
- tabıǵı monopolııalar salalarynda memlekettik saıasatty qalyptastyrý jáne iske asyrý jáne ony júzege asyrýdy uıymdastyrady;
- Qazaqstan Respýblıkasyndaǵy kásipkerlik qyzmetti retteýdiń jaı-kúıi týraly jyldyq esepti ázirleý jáne bekitý;
- tsıfrlyq maınıng jónindegi qyzmetti lıtsenzııalaý qaǵıdalaryn kelisý;
- kásipkerlikti memlekettik retteý salasyndaǵy memlekettik saıasatty qalyptastyrý jáne iske asyrý;
- jumyskerlerdiń jyldyq ortasha sanyn jáne jyldyq ortasha tabysty esepteý qaǵıdalaryn bekitý;
- jeke kásipkerlik sýbektilerin damytý úshin kedergilerdi joıý maqsatynda ekonomıka salalarynyń jumys isteýine taldaý júrgizý;
- Qazaqstan aýmaǵyn uıymdastyrýdyń Bas shemasyna sáıkes, ońtaıly aýyldyq qonystandyrý shemasyn bekitý;
- jumyldyrý, soǵys jaǵdaıy kezeńinde jáne soǵys ýaqytynda QR aýmaǵynda áskerı-kóliktik mindet qaǵıdalaryn bekitý;
- ekonomıka salalarynan Qarýly Kúshterdiń, basqa da áskerler men áskerı quralymdardyń, arnaýly memlekettik organdardyń jumyldyrý qajettilikterin aıqyndaý qaǵıdalaryn bekitý.
«Jobany qabyldaý Ulttyq ekonomıka mınıstrligi týraly erejeni ózektilendirýge jáne ony qoldanystaǵy zańnamaǵa sáıkestendirýge múmkindik beredi. Jobany qabyldaý teris áleýmettik-ekonomıkalyq nemese quqyqtyq saldarǵa ákep soqtyrmaıdy», - dep túsindirme berilgen qaýly jobasyna.
Berilýi múmkin jańa fýnktsııalardyń tolyq tizimimen myna silteme arqyly ótip, tanysýǵa bolady.
Eske sala keteıik, búgin Memleket basshysynyń Jarlyǵymen Álibek Sakenuly Qýantyrov Ulttyq ekonomıka mınıstri laýazymyna qaıta taǵaıyndaldy.
