Ulttyq ekonomıka mınıstrligi damý áleýeti joǵary eldi mekenderdiń tizbesin qaıta qaraýy tıis -Asqar Mamın
NUR-SULTAN. QazAqparat - Osy jyldyń sońyna deıin Úkimetke 2020-2026 jyldarǵa arnalǵan jańartylǵan «Aýyl - el besigi» jobasyn engizilýi tıis. Búgin «Aýyl - el besigi» baǵdarlamasyn iske asyrýdyń jańa tetikterin maquldanǵan Úkimet otyrysynda Premer-Mınıstr Asqar Mamın osyndaı tapsyrma berdi, dep habarlaıdy QazAqparat tilshisi.
«Birinshi, Qarjy mınıstrligine Ulttyq ekonomıka mınıstrligimen birlesip, »Aýyl - el besigi« jobasyn qarjylandyrýdy 2020-2026 jyldary 900 mlrd teńgege deıin ulǵaıtý boıynsha usynystar engizýdi tapsyramyn. Jalpy barlyq baǵdarlama boıynsha, sonyń ishinde jergilikti ınfraqurylym, avtojol jelisin damytý, aýyz sýmen qamtamasyz etý jáne basqa da baǵdarlama boıynsha 2 trln teńge qarastyrylǵan. »Aýyl - el besigi« jobasy aýyldyq eldi mekenderdi damytý aýyldaǵy turmys sapasyn jaqsartý men jumys oryndaryn qurýdy kózdeıtin basqa da qujattar aıasynda júzege asyrylady», - dedi Asqar Mamın.
Onyń aıtýynsha, ekinshi, Ulttyq ekonomıka mınıstrligi múddeli memlekettik organdarmen jáne ákimdiktermen birlesip, qarjynyń ulǵaıýyna baılanysty damý áleýeti joǵary jáne spýtnıktik eldi mekenderdiń tizbesin osy aıdyń sońyna deıin qaıta qaraýy tıis. 2026 jylǵa deıin árbir jylǵa bólip jáne qajetti qarjy kólemin kórsetýi qajet.
«Jyl sońyna deıin Úkimetke 2020-2026 jyldarǵa arnalǵan jańartylǵan »Aýyl - el besigi« jobasyn engizsin. Úshinshi, ákimdikter 30 paıyz shamasynda birlesip qarjylandyrý kózderin aıqyndaýy kerek. Bul rette qalǵan 70 paıyz respýblıkalyq bıýdjetten qarjylandyrylady. Sonymen qatar damý áleýeti joǵary jáne spýtnıktik eldi mekenderde iske asyrylatyn jobalar úshin bıýdjetten tys qarajatty tartý kózin anyqtaý kerek. Jobalardyń qajetti qujattaryn daıyndap, árbir damý áleýetti joǵary jáne spýtnıktik aýyl úshin ekonomıkalyq damý josparyn jasaý qajet. Ulttyq ekonomıka mınıstrligi jobaǵa turaqty túrde monıtorıng júrgizsin», -dedi Úkimet basshysy.
