Ulttyq ekonomıka mınıstrligi azyq-túlik baǵalary nege ósip jatqanyn túsindirdi

ASTANA. QazAqparat - Qazaqstan Ulttyq ekonomıka mınıstrliginiń baspasóz xatshysy Samal Ybyraeva azyq-túlik baǵalarynyń nelikten sharyqtap bara jatqanyn túsindirdi, dep xabarlaıdy QazAqparat.

"Ulttyq ekonomıka mınıstrligi azyq-túliktik taýarlar baǵasynyń ózgerisi týraly árdaıym xabardar etip otyrady. Negizgi nazar, árıne, áleýmettik mańyzy bar taýarlarǵa beriledi. Olardyń quny jyl basynan beri nebári 2%-ǵa artqan. Eń kóp qymbattaǵan sıyr men qoı eti. Kókónisterden kartop, pııaz ben qyryqqabat baǵalary joǵarylady", - dedi ol OKQ ótken brıfıngte.

Onyń sózinshe, baǵalardyń ósýine maýsymdyq saqtaýǵa ketetin shyǵyndardyń ulǵaıýy áser etedi. Mal eti baǵasynyń joǵarylaýyna jem-jóp qunynyń kóterilýi yqpal jasaıdy, sebebi tasymal barysynda janar-jaǵarmaı baǵalary da osy kezde qymbattaı túsedi. 

"Qazir Ulttyq ekonomıka mınıstrligi taýarlyq qyzmetke qatysty birqatar zańnamalyq ózgeristerdi daıyndady. Olar qasqana baǵa ósirý oqıǵalaryna tosqaýyl qoıýǵa baǵyttalǵan", - dedi ol.

Atap aıtqanda, áleýmettik mańyzy bar taýarlarǵa eń joǵary baǵa taǵaıyndaý quzyryn jergilikti bılik enshisine berý kózdelgen. Mınıstrliktiń bul áreketi baǵanyń kóterilýine jedel nazar aýdarýǵa septigin tıgizbek. Sonymen birge  azyq-túlik taýarlarynyń baǵasyna qandaı sebepter áser etip jatqandyǵyn anyqtaý úshin jergilikti atqarýshy organdar men kásipkerler tyǵyz qarym-qatynasta bolady.