Ulttyq ekonomıka mınıstri «Nurly jol» baǵdarlamasyn júzege asyrýdaǵy birqatar problemalardy atady

ASTANA. QazAqparat - Búgin Premer-Mınıstr Kárim Másimovtyń jetekshiligimen ótip jatqan Úkimet otyrysynda «Nurly jol» memlekettik ınfraqurylymdy damytý baǵdarlamasynyń júzege asyrý barysy talqylandy. Ol boıynsha baıandama jasaǵan Ulttyq ekonomıka mınıstri Erbolat Dosaev baǵdarlama barysyndaǵy birqatar problemalardy atap ótti.

Mınıstrdiń aıtýynsha, «Nurly jol» baǵdarlamasynyń «Turǵyn úı kommýnaldyq sharýashylyq salasyn jańǵyrtý» baǵyty boıynsha 96 óńirlik jobalar josparlanyp, ákimdikterge 60 mlrd. teńge bólingen. «2015-2016 jyl boıynsha jalpy 258,8 shaqyrym jylý jáne sýmen qamtý jelilerin, sý bólý jumystaryn atqarý josparlanǵan. Jyl sońyna deıin 51,4 shaqyrymǵa deıin jelilerdi salý men qurylysyn jańǵyrtý kózdeledi. Qalǵan 57,4 shaqyrym 2016 jyly atqarylady. Baǵdarlamany júzege asyrý barysynda birqatar prorblemalar anyqtaldy. Birinshiden, bıýdjetti ıgerý máz emes. Máselen, Aqmola (57%), Pavlodar (66%), Qostanaı (40%) oblystary men Almaty (43%) jáne Astana (13%) qalalarynda bul kórsetkish tómen. Bul negizinen konkýrstyq úderisterdi ótkizý merziminiń keshigýimen baılanysty», dep atap ótti mınıstr Dosaev. Budan bólek, mınıstr baǵdarlamany júzege asyrý barysyndaǵy josparlaýdyń tıimsizdigin de atap ótti. Máselen, Qaraǵandy oblysy men Almaty qalasynda jobalar jobalyq-smetalyq qujattardyń joqtyǵyna baılanysty keıinge shegerilgen. Sonyń saldarynan bıýdjetti qaıta qaraý barysynda 3,5 mlrd. teńge qaıta bólindi. «Úshinshiden, qurylys-montajdaý jumysynyń sapasy da syn kótermeıdi. Atap aıtqanda, qurylys normalary men erejelerinen aýytqýshylyq Almaty, Shyǵys Qazaqstan, Batys Qazaqstan, Qyzylorda, Pavlodar, Soltústik Qazaqstan jáne Ońtústik Qazaqstan oblystarynda baıqaldy. Sonymen birge, bólingen qarajattyń tolyq ıgerilýi úshin oblys ákimderine keler jyly konkýrstyq úderisterdi ýaqytyly ótkizý týraly tapsyrma berýińizdi suraımyn», - dedi E. Dosaev.