Ulttyq ekonomıka mınıstri Qostanaı oblysyna jumys saparymen bardy

QOSTANAI. QazAqparat - Qostanaı oblysyna jumys sapary barysynda Ulttyq ekonomıka mınıstri Álibek Qýantyrov «Aýyl – El besigi» jobasy men memlekettik-jekeshelik áriptestik sheńberinde iske asyrylyp jatqan birqatar áleýmettik nysandar men kásiporyndardy aralady. Sonymen qatar oblys turǵyndarymen jáne qoǵamdyq birlestik ókilderimen kezdesti, dep habarlaıdy QazAqparat atalmysh vedomostvonyń baspasóz qyzmetine silteme jasap.

UEM basshysy Zarechnoe aýylyndaǵy qýattylyǵy 50 MVt «Ybyraı» jel elektr stansasynyń qurylysy barysymen tanysty. Jobanyń quny - 26 mlrd teńge.

Qostanaı qalasynda Ulttyq ekonomıka mınıstri Qazaqstandaǵy eń iri aýyl sharýashylyǵy tehnıkasyn óndirýshi «AgromashHoldıng KZ» zaýytynda boldy. Aǵymdaǵy jylǵy qańtar-aqpanda kásiporyn 5,5 mlrd teńgeniń ónimin shyǵarǵan. Óndiris 423 adamdy jumyspen qamtyp otyr.

Sol kúni mınıstr Qostanaı oblysynyń turǵyndarymen jáne qoǵamdyq birlestik ókilderimen kezdesti. Atap aıtqanda, halyqty jumyspen qamtý, aýyldardy damytý, áleýmettik nysandar salý, «Dıplommen aýylǵa» jobasy boıynsha turǵyn úıdi kredıtteý máseleleri qozǵaldy.

«Bıyl «Dıplommen aýylǵa» jobasy sheńberinde turǵyn úı satyp alý úshin bıýdjettik kredıt berýge 20 mlrd. teńge qarastyrylǵan. Onyń ishinde Qostanaı oblysynda 246 mamanǵa 1 mlrd.-tan astam teńge bólinedi», - dedi Á.Qýantyrov.

Mınıstrdiń aıtýynsha, óńirde «Aýyl – El besigi» jobasy qarqyndy iske asyrylýda. Aǵymdaǵy jyly respýblıka boıynsha 120 mlrd teńge bólindi. 570 aýyldyq eldimekendi qamtıtyn 1 044 joba júzege asyrylady. Qostanaı oblysynda 32 aýyldy qamtý josparlanýda.

Mınıstrlik sonymen qatar, óńirlik saıasatty jetildirý boıynsha jumys júrgizýde. Ótken jyly Qostanaı oblysynda 750 mln teńge somasyndaǵy 4 joba iske asyryldy.

«Sonymen birge, Memleket basshysynyń tapsyrmasyn oryndaý úshin óńirlerde ShOB-qa jeńildetilgen kredıt berýdiń jańa tetigi engizildi. Atalǵan memlekettik qoldaý sharalaryn iske asyrý shaǵyn jáne orta bıznesti damytýǵa qolaıly jaǵdaı týǵyzady», – dedi Ulttyq ekonomıka mınıstri.

Álibek Qýantyrov «Bıznestiń jol kartasy-2025» jáne «Qarapaıym zattar ekonomıkasy» baǵdarlamalary sheńberinde ótken jylǵy qorytyndy boıynsha Qostanaı oblysynda jalpy somasy 45 mlrd teńge kredıt somasyndaǵy 1 myńnan astam joba sýbsıdııalanǵanyn atap kórsetti.

Turǵyndarmen jáne qoǵamdyq birlestik ókilderimen kezdesýden soń, UEM basshysy azamattardy jeke qabyldaý ótkizdi.

Jumys saparynyń ekinshi kúni sheńberinde mınıstr Altynsarın aýylynda boldy. Ol «Aýyl – El besigi» boıynsha kúrdeli jóndeýden ótken Altynsarın jalpy bilim beretin mektebin aralap kórdi. Munda 200 bala oqıdy.

Mınıstr sonymen qatar MJÁ baǵdarlamasy boıynsha salynǵan nysandardy aralady. Olardyń qatarynda Qostanaıdaǵy jańa Muz saraıy da bar. Qurylys alańy 8 myń sharshy metrden asady. Ol 2 500 orynǵa eseptelgen. Sonymen qatar MJÁ sheńberinde qalada 50 metrlik basseın salyndy. Aýdany shamamen 4 myń sh.m.

Budan basqa, UEM basshysy Tabıǵı monopolııalardy retteý komıtetiniń Qostanaı oblysy boıynsha departamentinde bolyp, onda tarıf saıasatyn talqylady.