Ulttyq ekonomıka mınıstri qarqyndy ósim baıqalǵan salalardy atady

NUR-SULTAN. QazAqparat – Ulttyq ekonomıka mınıstri Rýslan Dálenov bıylǵy qańtar-qarashadaǵy Qazaqstannyń áleýmettik-ekonomıkalyq damý qorytyndysyn baıandady, dep habarlaıdy QazAqparat tilshisi.

«Qarashanyń qorytyndysy boıynsha ekonomıkalyq serpin qazan aıyna qaraǵanda neǵurlym joǵary. Oń trend baıqalady. Esepti kezeńde Qazaqstan ekonomıkasynda kelesi úrdister baıqalyp otyr. Qurylys jáne óńdeý ónerkásibi salalary serpindi ósýdi kórsetti. Qyzmet kórsetý sektorynda iskerlik belsendilik jaqsarýda, sondaı-aq uzaq paıdalanylatyn taýarlarǵa suranys qalpyna kele bastady», - dedi R. Dálenov Úkimet otyrysynda.

Mınıstrdiń aıtýynsha, naqty sektordyń ósýi 2%-ke deıin jedeldedi. Qyzmet kórsetý salasynyń ósý qarqyny mınýs 5,9%-ke deıin jaqsardy. Nátıjesinde, jalpy ishki ónimniń ósýi mınýs 2,8% deńgeıinde qalyptasty. Jyldyq ınflıatsııa 7,3%-ti qurady.

«Ken óndirý ónerkásibin esepke almaǵanda, ınvestıtsııalar 17,3%-ke ósti. Investıtsııalardyń eleýli kólemi turǵyn úı qurylysyna, kólik, óńdeý ónerkásibi, onyń ishinde azyq-túlik ónimderi, aýyl sharýashylyǵy salalaryna tartyldy. Ekonomıkany kredıtteý jyl basymen salystyrǵanda 4,2%-ke ulǵaıdy. Kredıtterdiń eń joǵary ósýi baılanys, qurylys, aýyl sharýashylyǵy jáne ónerkásip salalarynda baıqalady. Shaǵyn kásipkerlik sýbektilerin kredıtteý 8,9%-ke ulǵaıdy», - dedi Ulttyq ekonomıka mınıstri.