Ulttyq ekonomıka mınıstri Aqtóbedegi birneshe óndiris ornyn aralady

AQTÓBE. QazAqparat - Ulttyq ekonomıka mınıstri Álibek Qýantyrov Aqtóbe oblysyna jumys saparymen keldi. Ol aýyl turǵyndarymen kezdesip, áleýmettik nysandar men óndiris oryndaryn aralady, dep habarlaıdy QazAqparat tilshisi UEM baspasóz qyzmetine silteme jasap.

Mınıstr Aqtóbe qalasy Batys-2 shaǵyn aýdanyndaǵy Táýelsizdik dańǵylyn qaıta jóndeý jumysymen tanysty. Jol jóndeý jumystary «Qýatty óńirler – el damýynyń draıveri» Ulttyq jobasy aıasynda júrgizilip jatyr. Táýelsizdik dańǵylyn segiz jolaqqa deıin, al Mustafa Shoqaı kóshesin alty jolaqqa deıin keńeıtý josparlanǵan. Eki ýchaskeniń jalpy uzyndyǵy shamamen 2,5 km quraıdy. Jobanyń quny - 1,9 mlrd teńge.

«Bas merdiger qurylys materıaldarynyń qambattaýyna baılanysty jobany túzetý qajet ekenin aıtty. Qurylysty aıaqtaý úshin shamamen taǵy 800 mln teńge qajet. Bul qarajatty oblystyq bıýdjet esebinen bólý josparlanyp otyr. Ortalyq kóshelerdi keńeıtý qozǵalysty jeńildetýge múmkindik beredi. Barlyq jóndeý jumysyn 2023 jyldyń kúzine deıin aıaqtaý josparlanǵan», - dedi oblys ákimi O.Orazalın.
Keıin mınıstr memlekettik-jekemenshik áriptestik baǵdarlamasy boıynsha salynǵan jańa «AQQANAT» balalar onkogematologııalyq ortalyǵynda boldy. Zamanaýı klınıkada derti aýyr balalarǵa kómek kórsetiledi. Mundaǵy joǵary tehnologııaly medıtsınalyq jabdyqtar aýrýdy bastapqy satysynda anyqtaýǵa jáne qajetti emdeýdi taǵaıyndaýǵa múmkindik beredi. Ortalyqta 100 oryndyq statsıonar men bir aýysymda 50 balaǵa deıin qabyldaı alatyn keńes berý-dıagnostıkalyq bólimshe bar. Jobanyń quny - 5,2 mlrd teńge. Bir qıyny qarjylandyrý ádistemesi olardyń úzdiksiz jumys isteýine, ınvestorlardy qoldaýǵa kepildik bere almaıdy. Ulttyq ekonomıka mınıstri memlekettik-jekemenshik áriptestik aıasynda iske asyrylyp jatqan áleýmettik jobalardyń mańyzyna toqtalyp, kedergiler muqııat zertteletinine sendirdi.

Aıta keteıik, búginde Aqtóbe oblysynda jalpy somasy 25 mlrd teńgeni quraıtyn 14 memlekettik-jekemenshik áriptestik jobasy boıynsha sharttar jasaldy. Densaýlyq saqtaý salasynda 7, mádenıet jáne sport salasynda 4 joba, bilim berý salasynda 2, energetıka jáne turǵyn úı-kommýnaldyq sharýashylyq salasynda 1 joba bar.
Sondaı-aq, jumys sapary barysynda mınıstr keramogranıt shyǵaratyn «Zerde-Keramıka Aqtóbe» JShS zaýytynda boldy. Indýstrııalyq-ınnovatsııalyq damý memlekettik baǵdarlamasy aıasynda qoldaý alǵan kásiporyn óz ónimin ishki naryqqa jetkizip, shetelge eksporttaıdy. Óndiris protsesi tolyq avtomattandyrylǵan. Jobaǵa 9,2 mlrd teńge ınvestıtsııa salynǵan. Kásiporynda jylyna 2 mln sharshy metrge deıin ónim shyǵarylady. 150-ge jýyq adam turaqty jumys ornymen qamtamasyz etilgen. Qazirgi ýaqytta kásiporyn ornalasqan «Aqtóbe» ındýstrııalyq aımaǵyna qosymsha elektr qýaty qajet. Álibek Qýantyrov bul suraqty Energetıka mınıstriligimen birlesip talqylaıtynyn atap ótti. Sondaı-aq Qazaqstannyń damý bankiqarajaty esebinen bolat balqytý zaýytyn salý máselesi kóterildi. Jaqyn arada bul joba saraptamadan ótýi tıis. Sonymen qatar, osy jyldyń birinshi jartyjyldyǵynda óńirde 376 myń sharshy metr turǵyn úı paıdalanýǵa berildi. Atalǵan kezeńde jumys istep turǵan shaǵyn jáne orta sýbektileriniń sany 72 myńǵa deıin jetti. «Bıznestiń jol kartasy» baǵdarlamasy boıynsha memlekettik qoldaý sharalaryn iske asyrý úshin 5,1 mlrd teńge qarastyrylǵan. Jalpy, Aqtóbe oblysynyń áleýmettik-ekonomıkalyq damýynyń keshendi jospary aıasynda bıyl 41 is-sharany iske asyrý kózdelgen. Jospar bekitilgen sátten bastap halyqtyń osal toptary men kópbalaly otbasylar úshin jalǵa beriletin turǵyn úı qurylysy, «Aqtóbe – Hromtaý – Qarabutaq – Ulǵaısyn» avtojolyn qaıta qurý, jergilikti mańyzy bar joldardy kúrdeli jáne ortasha jóndeý, 15 aýyldyq eldi mekendi gazdandyrý jáne 11 aýyldyq eldi mekendi sýmen jabdyqtaý boıynsha jumystar bastaldy.