Ulttyq ekonomıka mınıstri 3 jyldyq bıýdjet shyǵystaryn jarııa etti

NUR-SULTAN. QazAqparat – 2022 jyly respýblıkalyq bıýdjet shyǵystary 15,9 trln teńge bolady. Bul týraly Senattyń jalpy otyrysynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

«Bıýdjet tapshylyǵy jalpy ishki ónimge qatysty 2022 jyly 3,3 paıyz deńgeıinde, keıinnen 2024 jyly 2,5 paıyzǵa deıin tómendeýmen boljanýda. Orta merzimdi kezeńde kontrtsıkldyq saıasat aıasynda munaı emes bıýdjet tapshylyǵy deńgeıin jalpy ishki ónimge qatysty 2022 jyly 8,1 paıyzdan 2024 jyly 6,3 paıyzǵa deıin tómendeıdi», - dedi «Áleýmettik-ekonomıkalyq damý boljamy» jáne «Ulttyq qordan kepildendirilgen transfert týraly» zań jobasy týraly baıandaǵan mınıstr.

Onyń atap ótýinshe, respýblıkalyq bıýdjettiń shyǵystary 2022 jyly - 15,9 trıllıon teńge, 2023 jyly – 15,6 trıllıon teńge jáne 2024 jyly 16 trıllıon teńge kóleminde boljanyp otyr.

«Jalpy úsh jyldyq bıýdjet jobasyn qalyptastyrý memlekettik josparlaý júıesin transformatsııalaý jaǵdaıynda júzege asyryldy. Jyldyń basynda qabyldanǵan jalpyulttyq basymdyqtar men eldiń damýynyń ulttyq jospary bıýdjet saıasatynyń basymdyqtaryn aıqyndady. Memlekettik organdardyń qarjylyq qajettiligine olardyń damytý josparlarynyń maqsattary men nysanaly ındıkatorlaryna sáıkes basymdyq berildi», - dedi Áset Erǵalıev.