Ulttyq dombyra kúnine oraı Túrkistanda respýblıkalyq «Kúı qudireti» baıqaýy ótti
Ulttyq dombyra kúnine jáne Qurmanǵazy Saǵyrbaıulynyń 200 jyldyǵyna arnalǵan respýblıkalyq baıqaýǵa 23 kúıshi qatysty. Astana, Almaty jáne Shymkent qalalary men Atyraý, Aqtóbe, Jambyl, Pavlodar, Abaı, Qyzylorda jáne Túrkistan oblysynan kelgen qatysýshylar bılet tańdaý arqyly, óz ónerlerin ortaǵa saldy.
Máselen, alǵashqy kezeńde Qurmanǵazy Saǵyrbaıulynyń «Serper», «Baıjuma», «Tóremurat» jáne Tólegen Mombekovtyń «Saltanat», «Qanaǵat» pen «Meshin» kúıleriniń birin oryndasa, ekinshi kezeńde Súgir Álıulynyń «Qosbasar», «Naz qońyr» men «Shalqyma» kúıleriniń birin tartýǵa talap qoıyldy.
Saıysqa qatysýshy ónerpazdardyń ónerin Erkeǵalı Rahmadıev atyndaǵy memlekettik akademııalyq fılarmonııasy qazaq orkestriniń dırıjeri, kúıshi-kompozıtor Nurlan Bekenov, QR Mádenıet qaıratkeri, professor Sálimgereı Sadyqov, QR Mádenıet salasynyń úzdigi, Súgir atyndaǵy ult-aspaptar orkestriniń bas dırıjeri Erlan Dáýrenbekov, QR Mádenıet salasynyń úzdigi, kúıshi Shyńǵys Isaev, Qurmanǵazy atyndaǵy qazaq ulttyq Konservatorııasynyń magıstri Serik Pazylov baǵalap, qazylyq etti.
Úmitkerlerdiń ónerin baǵalaý kezinde tóreshiler qatysýshylardyń oryndaýshylyq sheberligine, shyǵarmanyń kúrdeliligine, sahna mádenıeti men ulttyq kıimine basa nazar aýdardy.
Qazylar alqasynyń sheshimimen bas júlde Súndet Abdýjabbarovqa (Shymkent qalasy) buıyrdy. Júldeli І oryndy Jandos Qulymbetov (Túrkistan oblysy), júldeli ІІ oryndy Meıirbek Ázimbaev (Taraz qalasy) pen Daryn Qudaıbergenov (Astana qalasy), júldeli ІІІ oryndy Ernar Sátim (Almaty qalasy), Nurdáýlet Qýandyqov (Túrkistan oblysy) pen Dáýlet Janshın (Aqtóbe oblysy) ıelendi. Sonymen qatar Nartaı Nurmaǵanbetov (Qyzylorda oblysy) - Qurmanǵazy atyndaǵy arnaıy júldemen, Serik Jumaǵalı (Almaty qalasy) - Súgir Áli atyndaǵy júldemen, Nursultan Oraztaev (Shymkent qalasy) - Tólegen Mombekov atyndaǵy júldemen marapattaldy.
Al, Maǵjan Toıshybek (Túrkistan oblysy), Qanat Qyzylǵulov (Atyraý oblysy), Nurasyl Matjan (Almaty qalasy) jáne Meıram Aıtmaǵanbetovke (Astana qalasy) qarjylaı júlde tabystaldy.
Aıta keteıik, qazaq ónerin nasıhattaı otyryp qazaq halqynyń mádenı murasynyń biregeıi – kúı ónerin keńinen nasıhattaý, kúı oryndaý ónerin damytý jáne talantty kúı oryndaýshylardy anyqtaý, olardyń shyǵarmashylyǵyna qoldaý kórsetý, halyqtyń rýhanı dúnıetanymyn keńeıtý, kúı atasy atanǵan Qurmanǵazy Saǵyrbaıuly men jergilikti Túrkistan óńiri kúıshileri – Qarataý kúıshilik óneriniń beldi ókili Súgir Álıulynyń jáne shertpe kúıdiń sheberi atanǵan Tólegen Mombekovtiń shyǵarmalaryn nasıhattaý maqsatynda ótken baıqaýdy Túrkistan oblystyq mádenıet jáne týrızm basqarmasy men oblystyq mádenıet jáne halyq shyǵarmashylyǵy ortalyǵy birlese uıymdastyrdy.
