Ulttyq dárilik formýlıarmen jumys isteıtin medıtsına qyzmetkerin oqytatyn sarapshylar toby daıyndalýda
20-21 maýsymda Astanada jańa, tegin, patsıentter men dárigerler úshin qoljetimdi Qazaqstandyq ulttyq dárilik formýlıardy (ári qaraı - QUF) tolyqqandy qoldaný boıynsha semınar ótti. 2 kúnniń ishinde halyqaralyq keńesshiler men QR DSÁDM mamandary Astanadaǵy jáne jaqyn aımaqtardaǵy negizgi sarapshylarǵa QUF-tyń artyqshylyqtary týraly aıtyp, nusqaýlyq berdi, sonymen qatar, jańa resýrsty qoldana otyryp, patsıentterge dárilerdi durys taǵaıyndaý týraly áńgimelep berdi.
Semınar qatysýshylary aldynda sóz sóılegen QUF jasaýshylarynyń biri, EBN Health kompanııasynyń basqarýshy dırektory Dýnkan Enraıt: «Biz QUF-ty Qazaqstandaǵy densaýlyq saqtaý salasynyń qyzmetkerlerine tikeleı jetkizip otyrǵanymyzǵa qýanyshtymyz. Biz patsıentterge kórsetiletin medıtsınalyq kómekti jaqsartýmen qatar, medıtsınalyq qyzmetkerlerge kómekshi qural bola alatyn jańa resýrsty durys qoldanýdy úıretemiz. Jumysy qyrýar dárigerlerge formýlıar sońǵy dáleldemelerge súıene otyryp, qandaı jańa dárilerdiń bekitilgeni týraly aqparat beredi. Sonymen birge, ol densaýlyq saqtaý júıesi qyzmetkerlerine dárini tańdaý men onyń mólsherlemesiniń durys ekendigine kóz jetkizip, ózderi qoldanatyn dárilik zattar týraly kez kelgen jańa aqparatty bilýine múmkindik beredi. Semınarǵa qatysýshylar QUF-ty qoldaný týraly ózgelerge aqparat berip, onyń ári qaraı keńinen qoldanylýyna kómektesetinine senimdimin», - dedi.
Semınarǵa qatysýshylar óz uıymdarynda alǵan bilimderin keńinen taratýǵa múmkindik beretin qajetti materıaldardy aldy.
23-24 maýsym kúnderi semınar Aqtóbe qalasynda, 27-28 maýsymda Almatyda ótedi.
Esterińizge sala keteıik, Qazaqstandyq ulttyq dárilik formýlıar Ulybrıtanııa jáne Jańa Zelandııa elderinde formýlıardy jasaǵan halyqaralyq sarapshylar EBN Health kompanııasynyń basqarýshy dırektory Dýnkan Enraıt pen atalǵan kompanııanyń emhanalyq dırektory Devıd Výdstyń qatysýymen jasaldy.
QUF quramynda emhanalyq tıimdiligi dáleldengen dáriler bar, ol álemdegi eń úzdik formýlıarlar qaǵıdasy boıynsha jasalǵan. Formýlıar www.knf.kz boıynsha onlaın-baılanys arqyly qoljetimdi, ony kompıýter arqyly, sonymen qatar, smartfondar men planshetter sııaqty mobıldik tehnologııalar arqyly qoldaný jeńil ári ońaı. QUF ózekti aqparatpen qazaq jáne orys tilderinde der ýaqytynda qamtamasyz etý maqsatynda únemi jańatylyp otyrady. Onyń mindeti - árbir azamatqa, onyń áleýmettik dárejesi men kiris deńgeıine qaramastan, dárilerdi tıimdi qoldanýdy qamtamasyz etý men qoljetimdi farmatsevtik kómek kórsetý bolyp tabylady.