«Ulttyq chempıonǵa» laıyqty jeti otandyq kompanııa anyqtaldy - «Báıterek» holdıngi

ASTANA. QazAqparat - «Ulttyq chempıonǵa» laıyqty jeti otandyq kompanııa anyqtaldy. Bul týraly búgin Astanada «Básekege qabiletti kóshbasshylar - ulttyq chempıondar» baǵdarlamasyn talqylaý jónindegi basqarýshylyq komıtettiń otyrysynda «Báıterek» holdınginiń basqarma tóraǵasy Qýandyq Bıshimbaev málim etti.

Aıta keteıik, McKinsey&Company halyqaralyq konsaltıngtik kompanııasy men «Báıterek» holdınginiń sarapshylarynan quralǵan komanda «Básekege qabiletti kóshbasshylar - ulttyq chempıondar» baǵdarlamasyna qatysýshy kompanııalardy dıagnostıkalaý kezeńin aıaqtady. Baǵdarlama óńirlik jáne álemdik deńgeıdegi kompanııalardy qalyptastyrý jolymen Qazaqstanda básekege qabiletti, eksportqa baǵdarlanǵan shıkizattyq emes sektordyń óndirisin qurýǵa negizdelgen.

«Báıterek» holdıngi Ulttyq kásipkerler palatasymen birlesip «Ulttyq chempıondar» baǵdarlamasyn Elbasynyń tapsyrmasymen iske asyryp jatyr. 28 kompanııa búginde «Ulttyq chempıondar» tizimine engizildi. Sonyń ishinde jeteýin daıyn chempıon dep aıtýǵa bolady, sebebi, olar eksportqa da shyǵýda jáne ishki naryqqa da úlesi qomaqty. Búgin baǵdarlamanyń atqarylyp jatqandyǵyn biz baıandadyq», - dedi Q. Bıshimbaev.

Belgili bolǵandaı, bul jeti kompanııanyń arasynda «RG Brands», «Eurasian Foods Corporation», «Agroónim», «Baıan Sulý», «Maslo-Del», «Alageum Group», «Alina» sekildi kásiporyndar bar.

Onyń sózine qaraǵanda, McKinsey&Company kompanııasy men halyqaralyq sarapshylar atalǵan kompanııalarǵa konsaltıngtik kómek berip jatyr. Osy oraıda otandyq kásiporyndardyń eksportqa shyǵý múmkindikteri, ishki úderisterdi damytý men ónimdilikti arttyrý turǵysynda baǵyttary aıqyndaldy, sondaı-aq kompanııalar osy jańashyldyqtardy qabyldap, júzege asyrýǵa kirisedi.

«Báterek» holdınginiń óz tarapynan qarjylaı kómek jasaıdy. Dıagnostıkalaýdyń barsha kezeńinde atalǵan 28 kompanııanyń aıasynda 170 mlrd. teńge kólemindegi jobalar aıqyndaldy. Sol jobalardy aldaǵy eki jyldyń ishinde iske asyrmaqpyz», - dedi Q. Bıshimbaev.

Onyń paıymynsha, «ulttyq chempıondar» úsh jylda Qazaqstannyń eksporttyq áleýetin eleýli arttyratyn bolady.

«Biz aıtqan bastamalardy iske asyrý nátıjesinde ónerkásiptiń óńdeýshi salasynda qosymsha bes myń jumys orny qurylady. Biz anyqtaǵan jobalardy iske qosý arqyly shıkizattyq emes ónimniń eksporty kóteriledi», - dedi ol.