Ulttyq bıýro taǵy bir basshyǵa eskertý jasady
Sybaılas jemqorlyqqa qarsy is-qımyl jónindegi ulttyq bıýro tóraǵasynyń orynbasary Shyńǵys Qabdollanyń aıtýynsha, búginde Almaty oblysynda kóliktik baqylaý ınspektorlary parany jıi alady. Máselen, byltyr 9 adamnan quralǵan qylmystyq top quryqtaldy. Oǵan deıin ınspektsııanyń taǵy úsh qyzmetkeri - Asylbaev, Ertaev jáne Baımoldaev ustalǵan bolatyn. «Al 2016 jyly Súleımenqulov pen Jumaǵulov qolǵa tústi. Ulttyq bıýro birneshe ret eskertý jasady. Sol kezde atalǵan qurylymnyń basshysy Baımoldınov jumystan ketýge májbúr boldy. Alaıda birshama ýaqyttan keıin atalǵan azamat QR Indýstrııa jáne ınfraqurylymdyq damý mınıstrliginiń basqa aýmaqtyq qurylymyna basshy bolyp bardy. Ony ónerkásiptik qaýipsizdik jáne ındýstrıaldy damý komıtetiniń departament jetekshisi qyzmetine taǵaıyndady. Áli kúnge deıin sol jerde istep júr. Mınıstrliktiń ondaı ustanymy túsiniksiz», - dedi Sh.Qabdolla Astanada ótken jıynda.
Onyń sózine qaraǵanda, sońǵy eki jyldyń ishinde QR Indýstrııa jáne ınfraqurylymdyq damý mınıstriligi boıynsha 100-den astam jemqorlyq oqıǵasy tirkeldi. Atalǵan faktilerge qatysy bar 59 qylmystyq jaýapkershilikke tartylyp, 40-tan astam adam sottaldy. Olardyń ishinde respýblıkalyq dárejesi bar 4 basshy jáne oblys deńgeıindegi 30 basshy bar. «Al mınıstrlikke qarasty qurylymdardy bólek-bólek qarastyratyn bolsaq, jemqorlyq áreketteriniń basym bóligi - 70 protsenti kóliktik baqylaý komıtetine, geologııa men jer qoınaýyn paıdalaný komıetine, sondaı-aq, kásibı qutqarý qyzmeti men «Qazavtojol» sııaqty mekemelerge tıesili. Atalǵan qurylymdardyń qyzmetkerleri kóp jaǵdaıda kelisimshartqa qol qoıǵany úshin para alyp otyrady. Budan bólek, ákimshilik sharalardy qoldanbaǵany úshin aqsha alady. Memlekettik satyp alý salasynda da jemqorlyq faktileri kóp. Birinshi basshylar qylmystyq shemalardy da jasaıdy. Oǵan oblystyq fılıaldar men qurylymdyq uıymdardyń qyzmetkerleri atsalysyp otyrady», - dep atap kórsetti Sh.Qabdolla.