Ulttyq bıýro Hrapýnovtar otbasyna aıyp taqty
ASTANA. QazAqparat - Sybaılas jemqorlyqqa qarsy is-qımyl ulttyq bıýrosy Vıktor jáne Leıla Hrapýnovtarǵa qatysty qylmystyq isti tergep jatyr, dep habarlaıdy vedomstvonyń baspasóz qyzmeti.
Qazirgi tańda tergeý barysynda jınalǵan dáleldemeler kúdikti V.V. Hrapýnovtyń áreketteri 1996 jylǵy QR QK 235-baby (bir nemese birneshe qylmys jasaǵany úshin uıymdasqan top qurý jáne ony basqarý, sondaı-aq oǵan qatysý), 176-baby (senip tapsyrylǵan múlikti zańsyz ıelený jáne urlaý), 177-baby (alaıaqtyq jasaý), 193-baby (zańsyz jolmen alynǵan aqshany jáne ózge múlikti zańdastyrý), 307-baby (laýazymdyq ókildigin asyra paıdalaný), 311-baby (para alý) boıynsha asa aýyr qylmystar jasaǵanyn anyqtaýǵa múmkindik berdi.
L.K.Hrapýnovanyń quqyqqa qaıshy áreketteri 235-baby (bir nemese birneshe qylmys jasaǵany úshin uıymdasqan top qurý jáne ony basqarý, sondaı-aq oǵan qatysý), 177-baby (alaıaqtyq jasaý) jáne 193-babyna (zańsyz jolmen alynǵan aqshany jáne ózge múlikti zańdastyrý) sáıkes kelse, al A.K.Іlııasov 177-baby (alaıaqtyq jasaý) boıynsha aıyptalýda.
Qazaqstan Respýblıkasy Qylmystyq is júrgizý kodeksiniń 206-babynyń 1-bóligine sáıkes (QR Qylmystyq is júrgizý kodeksi) kúdiktiniń áreketin saralaý týraly qaýly úkim shyqqan kúnnen bastap jıyrma tórt saǵattan keshiktirmeı jarııalanady. Kúdikti nemese onyń qorǵaýshysy kelmegen jaǵdaıda, qaýly jıyrma tórt saǵat ótken soń jarııa etilýi múmkin.
Kúdikti V.V.Hrapýnov, L.K.Hrapýnova jáne A.K.Іlııasovtyń QR aýmaǵynan tys jerde turýyna jáne qatysýdan jaltarýǵa baılanysty Sybaılas jemqorlyqqa qarsy is-qımyl qyzmeti zańǵa sáıkes, prokýrormen kelise otyryp BAQ-ta olardyń áreketterin saralaý týraly habarlama jarııalaıdy.
Úkimniń jarııalanýyna qatysý úshin jáne qajetti tergeý áreketterin júrgizý úshin kúdikti V.V.Hrapýnov, L.K.Hrapýnova jáne A.K.Іlııasov 2017 jyldyń 24 qazanyna deıin Sybaılas jemqorlyqqa qarsy is-qımyl ulttyq bıýrosynyń myna mekenjaıdaǵy ákimshilik ǵımaratyna kelýi tıis: QR, Astana q., Seıfýlıın kóshesi, 37.
Eske salaıyq, budan buryn bıyl 17 qazanda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń sybaılas jemqorlyqqa qarsy kúres boıynsha Ulttyq bıýrosy kúdikti Vıktor Hrapýnov pen Leıla Hrapýnovany, A.K.Ilıasovty jaýap alýǵa shaqyrǵan edi. Alaıda olar qylmystyq ispen tanysý úshin Qazaqstanǵa kelgen joq.
