Ulttyq bıýro baǵa statıstıkasyn túbirtek arqyly júrgizbek

NUR-SULTAN. QazAqparat – Ulttyq bıýro baǵa statıstıkasynyń rastyǵyn E-price júıesi arqyly tekserýge kóshedi, dep habarlaıdy QazAqparat tilshisi.

QazAqparat saýalyna joldaǵan jaýabynda bıýronyń baspasóz qyzmeti osyndaı málimet berdi.

«Aqparat kóziniń taǵy bir túri – E-price júıesi. Ulttyq statıstıka bıýrosy aı saıyn tutyný baǵalarynyń ındeksi boıynsha saýda oryndarynda ár túrli taýarlardyń baǵasyna monıtorıng júrgizedi. Ol dástúrli jolmen júrgiziledi. Bizdiń qyzmetker ár dúken, sýpermarketke baryp, baǵalardyń ózgerisin baqylaıdy. Al, E-price júıesi sol saýda oryndaryndaǵy taýarlardyń baǵasyn fıskaldy chek arqyly baqylap otyrady. Osy atalǵan júıe negizinde ózimizdiń tirkegen baǵalarymyzdyń dáıektiligin tekseremiz», - deıdi bıýro mamandary.

Sondaı-aq, vedomstvo saýda oryndarynyń ıelerine naryq týraly tegin saraptama usynýdy josparlap otyr.

«Elektrondy túrde tapsyrylatyn eseptiń úlesin arttyrýdy kózdep otyrmyz. Yntalandyrý quraly retinde esepti saıt arqyly tapsyratyndarǵa analıtıkalyq aqparat usynýdy josparlap qoıdyq. Mysaly, saýdamen aınalysatyn mekeme esebin onlaın tapsyrdy delik. Esep kezeńi aıaqtalǵanda, biz oǵan sol saýda naryǵy boıynsha tolyq saraptama usyna alamyz. Sol aımaqta taǵy qansha uqsas mekeme bar, saýdadaǵy úlesi, olardaǵy satylym kólemi, ıaǵnı daıyn marketıngtik zertteý. Bul olardyń jumys tıimdiligin kórýge múmkindik beretin qural bolady», - delingen Ulttyq statıstıka bıýrosy usynǵan málimette.

Buǵan deıin habarlaǵanymyzdaı, Ekonomıkalyq yntymaqtastyq jáne damý uıymy Qazaqstannyń statıstıka júıesine 3 jyldyq sholý jasaıdy.