Ulttyq býrjýazııa áleýmettik qamtamasyz etýge belsene qatysýy tıis – Memleket basshysy

NUR-SULTAN. QazAqparat – Ulttyq býrjýazııa áleýmettik qamtamasyz etýge belsene qatysýy tıis. Bul týraly Aqordada Prezıdenttiń kadr rezervine engen jastarmen kezdesýde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Biz memlekettiń áleýmettik saıasatynyń ońtaıly modelin izdep jatyrmyz. Barynsha ózektisi ataýly áleýmettik kómek máseleleri sanalady. Ol barynsha ótkir, qoǵamymyzda aıtarlyqtaı jıi kóteriledi. Memleket shyn máninde muqtajdarǵa kómektesýi kerek. Adamdardy oryndalmaıtyn dámege qamshylaýǵa bolmaıdy. Bul jol tuıyqqa tireıdi», - dedi Memleket basshysy.

Qasym-Jomart Toqaev el Úkimeti kirisine qaramastan barlyq kópbalaly otbasylarǵa járdemaqy tóleıtindigin aıtty.

«Buǵan qosa, az qamtylǵan otbasylardyń barlyq balasy kepildendirilgen áleýmettik paket alatyn bolady. Mektep jasyna deıingi balalar azyq-túlik jınytyǵy men eń birinshi qajetti ózge de zattardy alady. Az qamtylǵan otbasydan shyqqan mektep oqýshylary úshin tegin ystyq tamaq, sabaqqa baryp-qaıtý jolaqysy, mektep formasy, qajetti qural-jabdyqtar beriledi. Munyń barlyǵy memleket esebinen ekendigi túsinikti. Ulttyq býrjýazııa dep atalatyn otandyq bıznesmender de bizge qoldaý bildirgenin qalaımyz», - dedi Qazaqstan Prezıdenti.

Memleket basshysy mundaı tájirıbeniń Fınlıandııa, Shvetsııa, Chehııa, Estonııa syndy eýropalyq elderde bar ekendigin atap ótti.

«Ol jaqta kásipkerler áleýmettik qamtamasyz etýge belsene aralasady. 2017 jyldan bastap Nıý-Iorkte memlekettik kópshilikke arnalǵan mektepterdiń barlyq oqýshylaryna tegin túski as beriledi. Bul mıllıonnan astam balany qamtıdy. BUU búkilálemdik azyq-túlik baǵdarlamasynyń baǵalaýyna sáıkes, oqýshynyń tamaǵyna jumsalǵan árbir 1 dollardyń 3, tipti keıde 10 esege deıin qaıtarymy bolady. Bıznes ókilderiniń, metsenattar men demeýshilerdiń kómegimen bul mindetti sheshe alatyndyǵymyzǵa senimdimin», - dedi Qasym-Jomart Kemeluly.