Ulttyq biryńǵaı testileýge qalaı daıyndalý kerek?
ASTANA. 28 naýryz. QazAqparat - QR Bilim jáne ǵylym mınıstrliginiń Ulttyq biryńǵaı testileý ortalyǵynyń dırektory Qalı Ábdıev testke daıyndalý barysynda baıqaý synaqtaryna júginýge keńes beredi.
«Qazirgi kezde respýblıka boıynsha Ulttyq testileý ortalyǵynyń 154 bólimshesi bar. Qala jáne aýyl mektepteri sol bólimshelerge tapsyrys berip, baıqaý synaqtaryn ótkize alady. Memleket bekitken baǵanamaǵa sáıkes bir baıqaý synaǵynyń baǵasy - 255 teńge. Tapsyrys berilgennen keıin, biz test kitapshalaryn shyǵaryp, baıqaý synaqtaryn ótkizemiz. Mine, osyndaı daıyndyqtan ótken balalar jaqsy nátıje kórsete alady. Sebebi oqýshylar asyqpaı otyryp, barlyq test tapsyrmalaryn oryndaıdy. Beımálim suraqtardy muǵalimnen surap alýǵa da múmkindik bar. Bilýimizshe, keıbir jerlerde ondaı synaqtardy óte jıi ótkizedi. Menińshe, odan naqty nátıje shyqpaýy da múmkin. Onyń bárin taldaý qajet. Máselen, bir aıda bir baıqaý synaǵyn ótkizdik deıik. Osydan keıin test tapsyrýshy qansha suraqqa qate jaýap berdi? Onyń negizgi sebepteri qandaı? Osynyń bárin oqýshy muǵalimmen birge otyryp taldasa, ekinshi ret ótkizgen baıqaý synaǵynyń naqty nátıjesi kórinedi», - deıdi Q.Ábdıev.
