Ulttyq biryńǵaı testileýge deıin eki aı qaldy
ASTANA. QazAqparat - Mektep túlekteri máre syzyǵyna jaqyndap keledi - basty emtıhanǵa sanaýly aılar ǵana qaldy. Bıylǵy testileýdiń negizgi erekshelikteri jaıly Astana qalasynyń Bilim berý basqarmasy jalpy orta bilim berý bóliminiń basshysy Botagóz Júnisova aıtyp berdi, dep jazady Astana qalasy ákimdiginiń baspasóz qyzmetinen.
Onyń aıtýynsha, Ulttyq biryńǵaı testileý 1-15 maýsym aralyǵynda L.N. Gýmılev atyndaǵy Eýrazııa ulttyq ýnıverısteti, QazGZÝ jáne S. Seıfýllın atyndaǵy ATÝ bazasynda ótedi. Jergilikti atqarýshy organdar men mınıstrlik testileýdiń yńǵaıly ári sátti ótýi úshin UBT barlyq pýnktterinde qajetti jaǵdaılar jasaıtyn bolady. 2014/2015 oqý jylyndaǵy túlekter burynǵydaı Ulttyq biryńǵaı testileýden ótedi. Sáıkesinshe, qorytyndy ball túlektiń mektepte alǵan biliminiń qorytyndy baǵasy bolyp sanalady, sondaı-aq, joǵarǵy oqý oryndarynyń birine túsýge múmkindik beredi. UBT qazaq jáne orys tilderinde bes pán boıynsha ótedi: Qazaq nemese orys tili (oqytý tili), matematıka, Qazaqstan tarıhy, qazaq tili (orys tildi mektepterde), orys tili (qazaq tilinde bilim beretin mektepterde), tańdaǵan mamandyǵyna qaraı tańdalǵan pán. Tańdaý pániniń jáne mamandyqtar tizimi QR Bilim jáne ǵylym mınıstrligimen bekitilgen. Túlekter UBT-da tańdaǵan pánine sáıkes kelmeıtin mamandyqty tapsyra almaıdy. Testileý barysynda úsh jarym astronomııalyq saǵat - 210 mınýt beriledi. Ár pán boıynsha 25 test tapsyrmasyna jaýap berý kerek. Mektep bitirýshiler UBT ornyna, dástúrli emtıhan tapsyrýǵa quqyly. Biraq, «Altyn belgini» rastaý, Qazaqstannyń kez-kelgen joǵarǵy oqý ornyna aqyly nemese bıýdjettik negizde túsý, sondaı-aq, erekshe úlgidegi attestat alý úshin UBT tapsyrý mindetti. Bıyl elorda mektepterin 4 440 oqýshy bitiredi. Olardyń 186-sy «Altyn belgige» úmitker, 120-sy erekshe úlgidegi attestat alady. Astana qalasy Bilim basqarmasynyń málimetine súıensek, byltyr 3252 túlek Ulttyq biryńǵaı testileýge qatysty.
