Ulttyq biryńǵaı testileý kelesi jyly ózgeriske ushyraýy múmkin
ASTANA. 31 mamyr. QazAqparat /Gúlmıra Álıakparova/ - Ulttyq biryńǵaı testileý kelesi jyly ózgeriske ushyraýy yqtımal.
Búgin Astanada memlekettik tildi oqytý úderisindegi lıngvodıdaktıkalyq testileýdiń orny men mańyzy talqylanǵan respýblıkalyq ǵylymı-praktıkalyq semınar ótti. Onda Ulttyq testileý ortalyǵy memlekettik tildi damytý basqarmasynyń jetekshisi Aıdos Ábdihalyqov Ulttyq biryńǵaı testileýge artylǵan maqsattar óte kóp ekendigin aıtty.
«Bir ǵana is-sharaǵa (UBT-ǵa) birneshe mindetterdi artyp qoıǵan. Birinshi - orta bilim týraly attestatty alý, ekinshi - joǵary oqý oryndaryna grant negizinde túsý, úshinshi - JOO-larǵa kommertsııalyq negizde túsý. Qazir osy sharany birneshe bólikterge bólý máselesi qarastyrylyp jatyr. Kelesi jyly sol ózgeristerdiń kýási bolýlaryńyz múmkin», - dedi ol.
A.Ábdihalyqovtyń aıtýynsha, 2012 jyldan bastap UBT eki maqsatta ótkiziledi. Alǵashqysy, orta bilim týraly attestatsııa alý úshin mektep qabyrǵasynda ǵana ótkiziletin testiler, ekinshisi JOO-ǵa túsý úshin JOO-larda ótkiziletin testilik emtıhandar.
