Ulttyq biryńǵaı testileý bastaldy
ALMATY. Maýsymnyń 4-i. QazAqparat - Búgin QR Bilim jáne ǵylym mınıstri Janseıit Túımebaev Qanysh Sátbaev atyndaǵy Qazaq ulttyq tehnıkalyq ýnıversıtetinde ornalasqan UBT tapsyrý pýnktinde boldy.
Mınıstr jaýapty naýqan qarsańynda ata-ana jáne BAQ ókilderimen kezdesip, túlekterge sáttilik tiledi, dep habarlady atalmysh mınıstrliktiń baspasóz qyzmetinen.
Sonymen qatar bilim vedomstvosynyń basshysy 2010 jylǵy mektep bitirýshi 138 162 balanyń 110 118-i UBT tapsyrýǵa ótinish bildirgenin aıtty. Testileý maýsymnyń 4-10-y aralyǵynda 154 pýnktte (49 qala men 105 aýdan ortalyǵy) ótkiziledi.
Test tapsyrýshy túlekter barlyǵy jeti lekke bólindi. Bıyl bir lektegi oqýshylar sany 800-ge deıin azaıtyldy. Bul UBT-ny neǵurlym yńǵaıly jaǵdaıda tapsyrýǵa múmkindik beredi.
UBT 5 pán boıynsha: oqytý tili (qazaq nemese orys), Qazaqstan tarıhy, matematıka, tańdaý páni, sondaı-aq orys tilinde oqytatyn mektepterdegi - qazaq tili, qazaq tildi mektepterdegi - orys tili pánderi boıynsha ótkiziledi.
Árbir pán boıynsha test tapsyrmalarynyń sany - 25, al bes pán boıynsha barlyǵy - 125 suraq. Testileý ýaqyty - 210 mınýt, ıaǵnı 3,5 saǵat.
Bıylǵy jylǵy mektep bitirýshiler memlekettik grant konkýrsyna qatysý jáne respýblıkamyzdyń joǵary oqý oryndaryna aqyly negizde oqýǵa túsý úshin kem degende 50 ball («Jalpy medıtsına» mamandyǵy úshin - 55 ball) jınaýy tıis.
UBT-nyń balyn attestattyń baǵasyna aýystyrý shkalasy ózgerdi. Eger mektep bitirýshi bir pánnen 0-3 ball jınasa «qanaǵattanarlyqsyz», al 4 jáne odan joǵary ball jınasa ońdy kórsetkish bolyp tabylady.
«Memlekettik qupııalar týraly» Qazaqstan Respýblıkasynyń Zańyna sáıkes durys jaýaptar kody memlekettik qupııalar qataryna jatqyzylǵan.
Test tapsyrmalaryn baǵalaý kezinde biryńǵaı talaptardy saqtaý jáne daýly máselelerdi sheshý, UBT-ǵa qatysýshylardyń quqyqtaryn qorǵaý maqsatynda Respýblıkalyq komıssııa jáne árbir UBT-ny ótkizý pýnktinde apellıatsııalyq komıssııa qurylady.
Tapsyrmalardyń mazmuny jáne tehnıkalyq sebepterge baılanysty ótinishter testileýdiń qorytyndysy shyqqannan keıin kelesi kúngi saǵat 13.00-ge deıin qabyldanady.
Ulttyq mektepterdiń bitirýshileri (uıǵyr, ózbek, tájik) qalaýlary boıynsha UBT-ny memlekettik nemese orys tilinde tapsyra alady.
UBT-ny ótkizý kezeńinde oblystardyń, Astana jáne Almaty qalalary bilim basqarmalarynyń janynda UBT-nyń ótkizilý barysyn baqylaýdy qamtamasyz etetin shtabtar qurylady. Olardyń jumysyn QR Bilim jáne ǵylym mınıstrliginiń janyndaǵy respýblıkalyq shtab úılestiredi.
