Ulttyq biryńǵaı test tapsyrýǵa 3588 elordalyq túlek ótinim berdi
ASTANA. QazAqparat - Astanada ótken aıdyń sońynda mektep oqýshylarynan Ulttyq biryńǵaı testileýge qatysýǵa ótinimder qabyldaý aıaqtaldy. Osy ýaqyt ishinde oqytýshylar ár balamen qorytyndy attestatsııalaýdan ótý úlgisin tańdaý boıynsha túsindirý jumystaryn júrgizdi. Qazaqstandyq oqýshylarǵa UBT nemese memlekettik emtıhan tapsyrý quqyǵy beriledi.
Sońǵy málimetterge sáıkes, bıyl 4042 túlek mektep bitirse, sonyń ishinde «Altyn belgige» úmitker 143 bala testileýge qatysady, qalǵan 454-i óz erkimen test tapsyrýdan bas tartty.
UBT tapsyrý ýaqyty jaqyndaǵanda bul kórsetkish azaıýy múmkin, óıtkeni, halyqaralyq olımpıadalar men ǵylymı jobalar baıqaýlaryna qatysqan oqýshylar UBT tapsyratyndardyń málimetter bazasyna engizilmeıdi, dep habarlady www.astana.gov.kz .
Vedomstvonyń habarlaýynsha, mektep bitirgen soń oqýshylardyń 94%-y JOO-ǵa túsýdi, qalǵany kolledjder men kýrstardy bitirýdi, al basqalary jumys isteýdi josparlap otyr. Eske salaıyq, Ulttyq biryńǵaı testileý alǵash ret 2004 jyly ótkizildi. Sodan beri oǵan 1,3 mln-nan astam túlek qatysqan. Qazirgi kezde oqýshylar kem degende 50 ball, al ulttyq JOO-ǵa túsý úshin 70 ball (qazaq mektepteri úshin orys tili jáne orys mektepteri úshin qazaq tili páni eskerilmeıdi) jınaý kerek.
Búginde elimizdiń túlekteri maýsym aıynyń alǵashqy kúnderinde ótetin testileýge daıyndalyp jatyr.
