Ulttyq biliktilik testileýine jazylyp, kelmeı qalatyn muǵalimder bar
NUR-SULTAN. QazAqparat – Qazaqstandyq muǵalimder tamyz aıyna deıin Ulttyq biliktilik testin tapsyryp úlgermeı qalý qaýpi bar. Bul týraly Ulttyq testileý ortalyǵynyń dırektory Dıdar Smaǵulov aıtty, dep habarlaıdy QazAqparat tilshisi.
«Muǵalimder Ulttyq biliktilik test tapsyratyn kúnderin jıi aýystyrady. Ózderińiz bilesizder, muǵalimder test tapsyratyn kúndi ózderi belgileıdi jáne ýaqyty kelgende testileýge kelmeıdi. Tek Shymkent qalasynan júzdegen ótinish tústi. Olar testileýge kelmegendikten, qaıta ótinish berip, jazylady», - dedi Dıdar Smaǵulov Bilim jáne ǵylym mınıstrliginiń onlaın formatta ótken apparat jınalysynda.
Onyń atap ótýinshe, mundaı jaıt kóptegen muǵalimniń test tapsyrýǵa jazylýyna kedergi keltiredi. Óıtkeni, test tapsyratyn aýdıtorııalarda oryn az.
«Pandemııaǵa baılanysty ár pýnkte otyratyn oryn sanyn 50 paıyzǵa deıin qysqarttyq. Endi aýdıtorııada 75 adamnan kóp otyrmaıdy. Biraq, muǵalimder testileýge jazylǵanymen, kelmeı qalady. Múmkindik bolsa, muǵalimder jaýapkershiligin arttyrýy kerek. Jazylǵan kúninde kelip, test tapsyrsa jaqsy bolar edi. Óıtkeni, olar basqa muǵalimderdiń ornyn alady jáne barlyq pedagogtar tamyzǵa deıin Ulttyq biliktilik testinen óte almaı qalýy múmkin», - dedi ortalyq dırektory.
