Ulttyq biliktilik testileý talabyn buzǵan muǵalim «juldyzǵa» aınalýy múmkin
NUR-SULTAN. QazAqparat – Ulttyq testileý ortalyǵynyń dırektory Dıdar Smaǵulov Ulttyq biliktilik testileýinde tyıym salynǵan zat paıdalanǵan muǵalimder týraly beınerolık túsirip, áleýmettik jelide taratýdy usyndy, dep habarlaıdy QazAqparat tilshisi.
«Ulttyq biliktilik testileýinde tyıym salynǵan zattardy paıdalanǵan muǵalimderge qatysty beınerolık shyǵaryp, áleýmettik jeliler arqyly taratýdy usynamyz. Óıtkeni, sózben de aıttyq, jınalystarda da eskerttik. Testileý ótetin jerge bilim basqarmalarynyń ókilderi de keledi. Biraq, ókinishke oraı jaǵdaıdyń jaqsaratyn túri joq. Muǵalimder tyıym salynǵan zattardy qoldanýǵa tyrysady. Sondyqtan bizdiń usynysymyz, naqty faktiler boıynsha qaı oblystyń muǵalimi ekendigin kórsetip, beınerolıkter taratsaq», - dedi Dıdar Smaǵulov Bilim jáne ǵylym mınıstrliginiń onlaın formatta ótken apparat jınalysynda.
Osy oraıda QR Bilim jáne ǵylym mınıstri Ashat Aımaǵambetov bul usynysty zańnamalyq turǵyda qarastyrý qajettigin basa aıtty.
«Óıtkeni, bul jeke adamnyń quqyǵyna qatysty. Árıne, biz bir jaǵynan ustazdardyń mártebesi desek, ekinshi jaǵynan osyndaı keleńsiz jaǵdaılar bolǵanda ony da aıtýymyz kerek. Bes saýsaq birdeı emes. Keıbir áriptesterimiz zańǵa qaıshy qylyqtary bolsa tıisti shara qoldanýymyz qajet. Óte qatań shara qoldanylatyn bolady. Eki jumanyń ishinde 296 muǵalim zańsyz áreketke barǵan. Birinshiden, quqyq qorǵaý organdary tıisti jumys júrgizip bastady. Ekinshiden, bizdiń komıtet óz jumysyn bastaýy tıis. Úshinshiden, bilim basqarmalary, bólimder, mektep basshylary ár fakti boıynsha qyzmettik tekserý júrgizip, naqty shara qoldanýy kerek. Akademııalyq adaldyq degen osydan bastalady», - dedi Ashat Aımaǵambetov.
