Ulttyq banktiń kollektsııalyq monetalarynyń baǵasy neden quralady
NUR-SULTAN. QazAqparat – Altyn men kúmisten jasalatyn kollektsııalyq monetalarynyń baǵasy neden quralady? Nege bir moneta bir monetadan qymbat bolýy múmkin? London bırjasyndaǵy altyn men kúmistiń baǵasy monetanyń qunyna qalaı áser etedi? Bul týraly QR Ulttyq banki Qolma-qol aqsha aınalysy departamentiniń dırektory Jomart Qajymuratov túsindirip berdi, dep habarlaıdy QazAqparat.
«Monetanyń baǵasy eki quramdas bólikten turady:
– baǵaly metaldardyń quny monetanyń baǵasyna áser etetin negizgi quramdas bólik: ortasha eseppen altyn monetalardyń 85%, kúmis monetalardyń 52% deıingi baǵasy baǵaly metaldyń baǵasyna baılanysty qalyptasady;
– monetany daıyndap, oraýǵa ketetin shyǵyndar altyn moneta baǵasynyń 15%, kúmis moneta baǵasynyń 48% quraıdy.
Monetalardyń quny kún saıyn Londondaǵy baǵaly metaldar naryǵy qaýymdastyǵynyń tańǵy fıksıngine (baǵa belgileýine) sáıkes ulttyq valıýtanyń aldyńǵy jumys kúnindegi AQSh dollarynyń resmı baǵamy boıynsha teńgemen ındeksteletinin atap ótkim keledi. Mine, sondyqtan da, kollektsııalyq monetalardyń baǵasy kún saıyn ózgerip turady: birde qymbattasa, birde arzandaıdy», -dep málim etti Jomart Qajymuratov.
Onyń aıtýynsha, Ulttyq bank satylymynan paıda tabýdy kózdemeıdi.
«Kollektsııalyq monetalardy shyǵarýdaǵy maqsat – ortalyq bank elimizdiń mádenı jáne tarıhı murasyn saqtap, ony damytýǵa úles qosý, mańyzdy jetistikter men aıryqsha oqıǵalarǵa ǵasyrlyq ǵumyr berý».
