Ulttyq Banktiń qazirgi valıýta naryǵyna qatysýy májbúrli shara bolyp otyr – Ǵalymjan Pirmatov
«Ulttyq Banktiń qazirgi jaǵdaılarda valıýta naryǵyna qatysýy májbúrli shara bolyp otyr, óıtkeni jekelegen kezeńderde shetel valıýtasyn satýshylardyń bolmaýy ne sanynyń shekteýli bolýy baıqalýda, bul naryqtyń qalypty jumys isteýine teris áser etedi. Syrtqy faktorlar nasharlaǵan jaǵdaıda bırjalyq saýda-sattyqtyń jabylýy naryq qatysýshylary tarapynan úreı týǵyzyp, alypsatarlyq áreketterdiń odan ári órshýine ákelýi múmkin», - dep jazdy Ǵalymjan Pirmatov depýtattyq saýalǵa bergen jaýabynda.
Onyń aıtýynsha, bul jaǵdaıda ımporttaýshylar shetel valıýtasyn satyp ala almaıdy, óıtkeni qubylmalylyq pen belgisizdik artqanda ádette, valıýta naryǵynda shetel valıýtasynyń shekteýli usynysy baıqalady, bul aýyr saldarlarǵa ákep soǵýy múmkin.
«Ulttyq Bank Qazaqstan qor bırjasymen birlesip mámilelerdiń yqtımal kólemin barynsha ulǵaıtýǵa múmkindik beretin jáne negizsiz qubylýdyń aldyn alýǵa baǵyttalǵan Frankfýrt aýktsıony tetigin ázirledi. Máselen, 28 aqpanda jáne 9 naýryzda syrtqy geosaıası faktorlar tarapynan valıýta naryǵyna qysymdy azaıtý maqsatynda teńge - AQSh dollary jubynyń bırjadaǵy saýda-sattyǵy Frankfýrt aýktsıony formatynda ótti.
Bul rette Ulttyq Bank aıyrbastaý baǵamynyń erkin ózgerý qaǵıdattaryn ustanatynyn atap ótemiz. Teńge baǵamy budan bylaı da irgeli faktorlardyń áserinen qalyptasatyn bolady, munda qysqa merzimdi perspektıvada teńgeniń qubylmalyǵy geosaıası ahýaldyń damýyna, ishki qatysýshylardyń kútýine jáne álemdik naryqtardaǵy serpinge de baılanysty bolmaq», - dedi Ǵ. Pirmatov.