Ulttyq banktiń halyqaralyq rezervteri aqpan aıynda 1,1 paıyzǵa tómendedi
ALMATY. 6 naýryz. QazAqparat - Ulttyq banktiń jıyntyq halyqaralyq rezervteri aqpanda 1,1 paıyzǵa, al jyl basynan beri 5,8 paıyzǵa tómendedi.
Bul týraly bas bankır Grıgorıı Marchenko búgin Almatyda qarjy naryǵyndaǵy ahýal týraly ótken baspasóz máslıhatynda málim etti.
Ulttyq bank tóraǵasynyń aıtýynsha, halyqaralyq rezervterde aıtarlyqtaı ózgeris bolǵan joq. Taza halyqaralyq rezervter aqpanda negizinen Ulttyq qordyń aktıvterin tolyqtyrý maqsatynda valıýtany satý esebinen 1,1 paıyzǵa jáne jyl basynan beri 5,9 paıyzǵa kemidi. Sonyń nátıjesinde taza valıýta qorlary 1,1 paıyzǵa qysqardy. Altyndaǵy aktıvter júrgizilgen operatsııalar men álemdik naryqtarda onyń baǵasynyń tómendeýinen 1 paıyzǵa azaıdy. Aqpanda eldiń halyqaralyq rezervteri Ulttyq qordyń shetel valıýtasyndaǵy aktıvterin qosa alǵanda 86,2 mlrd. dollarǵa jetti. Ulttyq qordyń shetel valıýtasyndaǵy aktıvteri aldyn ala derekter boıynsha 59,5 mlrd. dollardy quraıdy.
