Ulttyq banktiń altyn-valıýta rezervteri jyl basynan 4,3 paıyzǵa tómendedi

ASTANA. QazAqparat – Ulttyq banktiń altyn-valıýta rezervteri jyl basynan beri 4,3 paıyzǵa tómendedi. Bul týraly Úkimet otyrysynda Ulttyq bank tóraǵasy Tımýr Súleımenov aıtty, dep habarlaıdy QazAqparat tilshisi.

«Jalpy halyqaralyq rezervter tamyz aıynyń sońynda 93,5 mlrd dollardy qurady. Ulttyq banktiń altyn-valıýta rezervteri jyl basynan beri 33,6 mlrd dollarǵa deıin, ıaǵnı 4,3 paıyzǵa tómendedi. Bul memlekettik boryshty tóleý maqsatynda Úkimettiń valıýta shottaryndaǵy qarajatty konvertatsııalaýǵa baılanysty boldy. Sonymen qatar salymdardyń dollarsyzdandyrý deńgeıiniń artýy aıasynda Ulttyq banktiń valıýtalyq shottaryndaǵy ekinshi deńgeıli bankter qarajatynyń azaıýy da áser etti», - dedi Tımýr Súleımenov.

Onyń dereginshe, Ulttyq qordyń aktıvteri jyl basynan beri 7,5 paıyzǵa, ıaǵnı 4,2 mlrd dollarǵa ulǵaıyp, jalpy kólemi 59,9 mlrd dollarǵa jetti. Negizgi ósim 6,1 paıyzdy nemese 3,4 mlrd dollardy quraǵan ınvestıtsııalyq tabys esebinen oryn aldy.

«Ulttyq qordan respýblıkalyq bıýdjetke transfertter 2,9 trln teńgeni qurady. Olardy júzege asyrý úshin Ulttyq qordyń valıýtalyq aktıvteri 4,9 mlrd dollarǵa satyldy. Qorǵa túsken túsimder jyl basynan beri 3,3 trln teńge boldy», - dedi ol.

Sonymen qatar Ulttyq bank tóraǵasy zeınetaqy aktıvteri de oń dınamıkany kórsetip otyrǵanyn aıtady.

«Biryńǵaı jınaqtaýshy zeınetaqy qorynyń aktıvteri jyl basynan 16,8 trln teńgege deıin nemese 14,6 paıyzǵa ulǵaıdy. Investıtsııalyq tabys kólemi jyl basynan beri 1,1 trln teńgeni qurady. Zeınetaqy jarnalary 1,4 trln teńge, al, jarnany merziminen buryn alý somasy 164,8 mlrd teńge boldy», - dedi Tımýr Súleımenov.