Ulttyq banktiń altyn-valıýta rezervteri 58,7 mlrd dollarǵa jetti

ASTANA. QazAqparat – Sáýir aıynda Ulttyq qorǵa túsken jıyntyq túsim mólsheri 292 mlrd teńgeni qurady. Úkimet otyrysynda baıandama jasaǵan QR Ulttyq banki tóraǵasynyń orynbasary Vıtalıı Týtýshkın osylaı málim etti, dep habarlaıdy QazAqparat tilshisi.

«Jalpy, halyqaralyq rezervter sáýir aıynyń sońynda 96,3 mlrd dollardy qurady. Altyn-valıýta rezervteri sáýir aıynyń qorytyndysy boıynsha altyn baǵasynyń ósýine jáne Úkimettiń shottaryndaǵy qarajattyń ulǵaıýyna baılanysty 1,5 mlrd dollarǵa ulǵaıyp, 37,6 mlrd dollar boldy.

Ulttyq Banktiń altyn-valıýta rezervteri sáýir aıynda aktsııalar portfeliniń ósýine baılanysty 0,5%-ǵa ulǵaıyp, 58,7 mlrd dollarǵa jetti», - dep baıandady Vıtalıı Týtýshkın.

Spıker Ulttyq qordan respýblıkalyq bıýdjetke transfert bólý úshin 600 mln dollarǵa baǵalanǵan qor aktıvteri satylǵanyn atap ótti.

«Ulttyq qordan respýblıkalyq bıýdjetke 393 mlrd teńgege transfert bólý úshin sáýir aıynda 600 mln dollar nemese 271 mlrd teńgeni quraıtyn Ulttyq qordyń aktıvteri satyldy. Qorǵa ótken aıda túsken jıyntyq túsim mólsheri 292 mlrd teńgeni qurady», - dedi Vıtalıı Týtýshkın.

Onyń málimetine saı, jyl basynan bastap sáýir aıynyń sońyna deıin teńgeniń dollarǵa qatysty baǵamy 2%-ǵa nyǵaıǵan.