Ulttyq banktiń altyn valıýta rezervi 28 mlrd dollardy qurady
NUR-SULTAN. QazAqparat – QR Ulttyq bankiniń altynvalıýta rezervi qarasha aıynda 2,9 paıyzǵa tómendedi. Bul týraly búgin Úkimet otyrysynda Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.
«Bıylǵy 1 jeltoqsandaǵy aldyn ala málimet boıynsha, Ulttyq banktiń altynvalıýta rezervteri 28,7 mlrd AQSh dollaryn qurady. Altyn portfeli qunynyń tómendeýi jáne bankterdiń Ulttyq banktegi shottarynan shetel valıýtasynyń jylystaýyna baılanysty altynvalıýta rezervteri qarashada 2,9 paıyzǵa nemese 842 mln AQSh dollaryna tómendedi. Alaıda bul kórsetkish Úkimet shottaryna valıýtanyń túsýimen ishinara óteldi», - dedi Ulttyq bank tóraǵasy.
Erbolat Dosaevtyń aıtýynsha, ulttyq qordyń aktıvteri 60,5 mlrd AQSh dollaryn qurap, qarashada 566 mln AQSh dollarǵa ulǵaıǵan.
«11 aıda Ulttyq qordyń aktıvterin basqarýdan alynǵan ınvestıtsııalyq kiris 3,4 mlrd AQSh dollary bolǵanyn atap óter edim», - dedi ol.
Aıta ketsek, buǵan deıin Erbolat Dosaev Qazaqstanda ulttyq valıýtadaǵy depozıtter arta bastaǵanyn málim etken edi.
