Ulttyq banktiń altyn-valıýta qoryndaǵy dollar úlesi 12 jylda 21 paıyzǵa qysqardy
ASTANA. QazAqparat - QR Ulttyq bankiniń altyn-valıýta qoryndaǵy dollar úlesi 12 jylda 21 paıyzǵa qysqardy. Bul jaıynda Májilistegi «Aqjol» fraktsııasynyń depýtattyq saýalyna jaýap bergen Ulttyq bank tóraǵasy Danııar Aqyshev málim etti, dep habarlaıdy QazAqparat tilshisi.
«Ártaraptandyrý maqsatynda Ulttyq bank altyn-valıýta rezervteriniń quramyndaǵy AQSh dollarynyń úlesin birte-birte tómendetti. Eger 2006 jyly ol 67 paıyz bolsa, 2018 jylǵy maýsymnyń sońynda 46 paıyzdy qurady»,- dep atap ótedi Ulttyq bank tóraǵasy.
Onyń aıtýynsha, shetel valıýtasyna ornalastyrylǵan aktıvter ınvestıtsııalyq tartymdylyǵy joǵary kredıttik reıtıngpen rastalatyn damyǵan jáne damýshy elderdiń memlekettik baǵaly qaǵazdaryna, basqa qarjy quraldaryna ınvestıtsııalandy. Mundaı tájirıbe aktıvterdiń saqtalýyn qamtamasyz etedi. Valıýtalardyń ár túrine ornalastyrylatyn aktıvterdiń qurylymy ótimdilik dárejesin, kiristilik deńgeıin, sondaı-aq jeke valıýtalarǵa shoǵyrlandyrý ósimin shekteýdi kórsete otyryp, únemi aýysyp turady.
«Ulttyq qordyń turaqtandyrý fýnktsııasyn iske asyrý sheńberinde jyl saıynǵy kepildik berilgen transfertti respýblıkalyq bıýdjetke qamtamasyz etý boljanady. Tıisinshe, qor aktıvteriniń bir bóligi ádette AQSh dollarynda nomınırlengen barynsha ótimdi qarjy quraldaryna ınvestıtsııalanady. Sondyqtan AQSh dollarynyń Ulttyq qordyń ınvestıtsııalaryndaǵy úlesi Ulttyq banktiń altyn-valıýta rezervterindegi úleske qaraǵanda joǵary. Qazirgi ýaqytta ol 63 paıyzdy quraıdy», - dedi ol.
