Ulttyq banktiń aqsha naryǵyndaǵy operatsııalarynyń teris saldosy baıqaldy
«2022 jyly 26 shildede Ulttyq bank qysqa merzimdi jáne orta merzimdi perspektıvada ınflıatsııa táýekelderiniń aǵymdaǵy balansyn eskere otyryp, bazalyq mólsherlemeni +/- 1,00 p.t. paıyzdyq aralyqta jyldyq 14,5% deńgeıinde bekitý týraly sheshim qabyldady. Aqsha naryǵynda aqsha-kredıt saıasaty operatsııalaryn júrgizý kezinde targetteletin mólsherleme – TONIA ındıkatory 2022 jyldyń maýsym aıynda paıyzdyq dáliz ishinde qalyptasty. TONIA-nyń ortasha alynǵan jyldyq máni 13,6% boldy (2022 jylǵy mamyrda – 14,4%)», - delingen Ulttyq bank málimetinde.
Atap aıtqanda, 2022 jyldyń maýsym aıy sońynda Ulttyq banktiń aqsha naryǵyndaǵy operatsııalarynyń teris saldosy (Ulttyq banktiń ashyq pozıtsııasy) 3,1 trln teńge boldy.
«Depozıttik aýktsıondar arqyly alynatyn ótimdilik kólemi 727,7 mlrd teńge, Ulttyq banktegi banktik depozıtter – 520,5 mlrd teńge boldy. 2022 jylǵy maýsymnyń sońynda aınalymdaǵy qysqa merzimdi nottar kólemi bir aıda 5,6%-ǵa ulǵaıyp, 1 796,2 mlrd teńgeni qurady. 2022 jylǵy maýsymda jalpy somasy 1460,9 mlrd teńgege Ulttyq bank nottarynyń 5 aýktsıony, onyń ishinde 1 360,4 mlrd teńgege 1 aılyq nottardy ornalastyrý boıynsha 4 aýktsıon ótkizildi. Ulttyq banktiń qysqa merzimdi nottaryn óteý kólemi 2022 jylǵy maýsymda 1 638,6 mlrd teńge boldy», - dep atalyp ótken UB aqparatynda.
Budan bólek, 2022 jyldyń maýsym aıynda QR Qarjy mınıstrligi 511 mlrd teńgege 1 jyldan 5 jyl aralyǵynda óteý merzimi bar orta merzimdi (MEOKAM) jáne uzaq merzimdi (MEÝKAM) memlekettik baǵaly qaǵazdardy ornalastyrdy. Olar boıynsha kiristilik jyldyq deńgeıde 13,62-14,5 paıyz boldy.
2022 jylǵy maýsymda QR Qarjy mınıstrliginiń aınalymdaǵy baǵaly qaǵazdar kólemi 11 692,5 mlrd teńgege deıin 3,98 paıyzǵa ósti.
