Ulttyq bank «Jylqy jyly» estelik monetasyn aınalymǵa shyǵardy
ASTANA. 4 jeltoqsan. QazAqparat - Qazaqstannyń Ulttyq banki 2013 jylǵy 3 jeltoqsannan bastap «proof» sapasymen nomınaly 500 teńgelik «Jylqy jyly» estelik monetasyn aınalymǵa shyǵardy. Ulttyq bank baspasóz qyzmetiniń habarlaýynsha, «Jylqy jyly» estelik kúmis jáne altyn monetalary - «Shyǵys kúntizbesi» monetalar serııasyn jalǵastyratyn tórtinshi shyǵarylym.
«Jylqy jyly» altyn jáne kúmis estelik monetalary on eki qyrly nysanda jasalǵan. Kúmisten jáne altynnan jasalǵan eki monetanyń bet jáne syrt jaǵyndaǵy beıneleri birdeı. Monetalardyń bet jaǵynyń (aversinde) ortalyq bóliginde aspan álemindegi juldyzdar kartasynda juldyzdar shoǵyrynyń mıfologııalyq sımvoldary beınelengen jáne moneta daıyndalǵan metaldy, onyń synamy men salmaǵyn (kúmisten jasalǵan monetada - «Ag 925 31,1 g», altynnan jasalǵan monetada - «Au 999 7,78 g») bildiretin jazý beınelengen.
Monetalardyń syrt jaǵynda (reversinde) ortalyq bólikte shyǵys kúntizbesi boıynsha 2014 jyldyń sımvoly - jylqy beınelengen jáne Qazaqstan teńge saraıynyń taýar belgisi ornalasqan. Monetany aınaldyra jalpaq kúńgirt jıek júrgizilgen, onyń ústine aınaldyra - oıyp jazylǵan «2014» jazýy bar qaýsyrma ornalasqan. Monetalardyń bet jáne syrt jaǵyndaǵy beıneler men jazýlar bederli.
