Ulttyq bank janynan Aqsha-kredıt saıasaty jónindegi komıtet qurylady
«Memleket basshysynyń Qazaqstan halqyna Joldaýyn iske asyrý maqsatynda Ulttyq bank tıisti sharalardy qabyldaıdy. Prezıdenttiń buǵan deıin bergen tapsyrmasyna sáıkes, Aqsha-kredıt saıasatynyń 2030 jylǵa deıingi strategııasy ázirlenýde. Joldaýda atalyp ótken júrgiziletin saıasattyń tıimdiligi men aıqyndylyǵyn arttyrý jónindegi tapsyrmalar strategııada eskeriledi. Strategııany bekitý eldiń 2025 jylǵa deıingi jańartylǵan Strategııalyq damý jospary qabyldanǵannan keıin josparlanyp otyr», - dedi UB basshysy Úkimet otyrysynda.
Onyń aıtýynsha, aqsha-kredıt saıasatyn iske asyrýdyń tıimdiligin arttyrý ári valıýta naryǵyn turaqtandyrý úshin Úkimetpen birlesip, valıýtalyq túsimdi elge qaıtarýǵa arnalǵan qosymsha sharalar pysyqtalady.
Sonymen qatar, eksporttaýshylardyń ony iske asyrýy úshin qolaıly jaǵdaı jasalady.
«Aqsha-kredıt saıasatynyń 2030 jylǵa deıingi strategııasynda Ulttyq bank janynda Aqsha-kredıt saıasaty jónindegi komıtet qurý eskeriledi. Onyń basty mindeti - bazalyq stavka men onyń dáliziniń mólsheri boıynsha strategııalyq sheshimder qabyldaý bolady. Orta merzimdi perspektıvada oǵan táýelsiz músheler kiredi. Zańnamalyq aktilerge tıisti ózgerister 2020 jyldyń sońyna deıin engiziledi», - dep túsindirdi E. Dosaev.
