Ulttyq bank zeınetaqy aktıvterin basqarýdyń tıimsizdigi týraly synǵa jaýap berdi

ASTANA. QazAqparat – Ulttyq banktiń basqarma tóraǵasy Ǵalymjan Pirmatov zeınetaqy aktıvterin Biryńǵaı jınaqtyq zeınetaqy qory arqyly basqarýdyń tıimsizdigi týraly syndardy negizsiz dep atady, dep habarlaıdy QazAqparat tilshisi.

Mundaı pikirdi ol Májilis depýtattarynyń sakýalyna bergen jaýabynda aıtqan.

«Іshki ekonomıkadaǵy aqshanyń qunsyzdanýynyń negizgi ólshemsharty valıýta baǵamy emes, eldegi ınflıatsııa deńgeıi bolyp tabylady. Osyǵan baılanysty zeınetaqy aktıvterin sıpattaıtyn uzaq ınvestıtsııalyq aralyqty eskere otyryp, olardy ınvestıtsııalaýdyń negizgi maqsattarynyń biri uzaq merzimdi kezeńde ınflıatsııa deńgeıinen joǵary kiristilik alý bolyp tabylady. Bul ınvestıtsııalanǵan qarajattyń satyp alý qabiletiniń saqtalýyn ǵana emes, sonymen qatar zeınetaqy jınaqtarynyń naqty mánde ósýin qamtamasyz etedi», - dep jazady Ulttyq bank basshysy.

Onyń málimetine qaraǵanda, 2014 jyldan beri BJZQ-nyń jyldyq ortasha kiristiligi jyldyq ortasha ınflıatsııadan joǵary bolǵan. Sondyqtan zeınetaqy aktıvterin BJZQ arqyly basqarýdyń tıimsizdigi týraly ýájder durys emes.

«Jalpy BJZQ-da zeınetaqy aktıvteri shoǵyrlanǵan sátten bastap (2014 jylǵy sáýir – 2022 jylǵy qarasha) jınaqtalǵan ınflıatsııa 111,2% bolǵan kezde zeınetaqy aktıvteri boıynsha jıyntyq kiristilik 114,2%-dy qurady. Osylaısha, BJZQ-nyń zeınetaqy aktıvterin basqarýdyń tıimsizdigi týraly jekelegen qysqa merzim aralyǵynda alynǵan kiristilik negizinde jasalǵan tujyrymdar durys emes bolyp tabylady. Jınaqtaýshy zeınetaqy júıesiniń ornyqtylyǵy turǵysynan kiristilik pen ınflıatsııa kórsetkishterin uzaq ýaqyt aralyǵynda qarastyrǵan jón», - delingen jaýapta.