Ulttyq bank valıýtanyń jetispeýi týraly aqparatty joqqa shyǵardy
ALMATY. QazAqparat - «Depozıtter áketilip jatyr, bankter aqsha berýden bas tartýda, bank bólimshelerinde valıýta jetispeıdi» dep jelide taralǵan habarlar dáıeksiz jáne arandatýshylyq aqparat. Bul týraly QazAqparat QR Ulttyq bankine silteme jasap habarlaıdy.
«Áleýmettik jelilerde, sondaı-aq WhatsApp jáne basqa messendjerler arqyly depozıtterdiń áketilip jatqany, bankterdiń aqsha berýden bas tartqany, bank bólimshelerinde valıýtanyń jetispegeni týraly dáıeksiz jáne arandatýshylyq aqparat taratylýda.
Osyǵan baılanysty Qazaqstan Ulttyq Banki barlyq bankterde qajetti valıýta qorlary bar ekendigin, Ulttyq Banktiń aýmaqtyq fılıaldary josparlanǵan rejımde bankterdi qolma-qol ulttyq jáne shetel valıýtasymen qamtamasyz etip jatqandyǵyn habarlaıdy. Depozıttik baza turaqty, bankterdiń klıentterine qyzmetter tolyq kólemde kórsetilýde», delingen habarlamada.
QR Ulttyq banki jalǵan aqparatty taratýshylardy jáne onyń avtorlaryn anyqtaý úshin quqyq qorǵaý organdaryna júgingenin de eske salady.
