Ulttyq bank valıýtalyq retteýge qatysty zańnyń jobasyn jarııalady
ALMATY. QazAqparat - QR Ulttyq bankiniń resmı saıtynda QR «Valıýtalyq retteý jáne valıýtalyq baqylaý týraly» zańynyń jobasy jarııalandy.
Jańa redaktsııadaǵy zań Qazaqstan zańnamasyn ekonomıkalyq ortanyń, onyń ishinde Qazaqstannyń Dúnıejúzilik saýda uıymyna kirýi nátıjesinde, ózgerýine beıimdeý maqsatynda qabyldanǵan.
«Astana» halyqaralyq qarjy ortalyǵynyń qurylýy sheteldik uıymdardyń fılıaldarynyń qazaqstandyq naryqqa kóptep kelýine septigin tıgizeri sózsiz. Osyndaı qarqyndy damyp kele jatqan naryq jaǵdaıynda valıýtalyq retteý jáne valıýtalyq baqylaý salasynda paıda bolatyn quqyqtyq qarym-qatynastardy retteý máselesi óte ózekti bolady. Zań osy maqsatta qabyldandy. Zań jobasyn qabyldaý transshekaralyq kapıtal qozǵalysynyń statıstıkalyq monıtorıngin jaqsartýǵa, valıýtalyq retteý rejımderiniń negizgi rásimderin ońtaılandyrýǵa, kásipkerlik qyzmet pen halyqtyń operatsııalarynda, sondaı-aq makroekonomıkalyq deńgeıde de júzege asatyn qolma-qol aqshasyz jáne qolma-qol konversııalyq operatsııalardyń táýekelderin barynsha azaıtýǵa múmkindik beredi», - delingen habarlamada.
Mamandardyń aıtýynsha, zań jobasynda lıberaldy valıýtalyq rejımniń qaǵıdattary jáne valıýtalyq retteýdiń qoldanystaǵy aqparattyq quraldary saqtalǵan. Sondyqtan, zań jobasyn qabyldaý bıznestiń damýyna kedergi keltirmeıdi.
