Ulttyq bank: Valıýta naryǵyna alypsatarlyq faktory yqpal etti
ASTANA. QazAqparat - Valıýta naryǵyndaǵy ahýal birtindep turaqtanýda. Bul týraly búgin selektorlyq rejimdegi Úkimet otyrysynda QR Ulttyq bankiniń tóraǵasy Danııar Aqyshev málim etti, dep habarlaıdy QazAqparat.
«Sońǵy birneshe aıda ishki valıýta naryǵy basym túrde alypsatarlyq faktormen baılanysty joǵary qubylmalylyqpen sıpattaldy. Alaıda ahýal birtindep turaqtanýda», - dedi D. Aqyshev eldiń áleýmettik-ekonomıkalyq damýynyń 2017 jylǵy 9 aıyndaǵy qorytyndysy jaıynda baıandaý barysynda.
Sonymen qatar Ulttyq banktiń altyn valıýta rezervteri jaıynda da aıtyp berdi. Ulttyq banktiń altyn valıýta rezervteri 2017 jylǵy qyrkúıektiń sońynda 33 mlrd AQSh dollaryna deıin, ıaǵnı 10,2 paıyzǵa ósti. Ulttyq qordyń shetel valıýtasyndaǵy valıýtalyq aktıvteri 57 mlrd AQSh dollaryn qurady.
Budan buryn habarlanǵandaı , Danııar Aqyshev ınflıatsııa jyl qorytyndysy boıynsha 6-8 paıyz nysanaly dálizdiń ishinde qalatynyn málim etti.
