Ulttyq bank:Tórt aıda jalpy ishki ónim 4,4 paıyzǵa ósti

NUR-SULTAN. QazAqparat – Bıylǵy 4 aıda jalpy ishki ónimniń ósýi 4,4 paıyz boldy. Bul týraly QR Ulttyq bankiniń tóraǵasy Ǵalymjan Pirmatov málim etti, dep habarlaıdy QazAqparat tilshisi.

«Ekonomıkanyń barlyq negizgi salalary ósip keledi. Ekonomıkanyń ósýine shıkizattyń joǵary baǵasy jáne karantın shekteýlerin alyp tastaý yqpal etti. Álemdegi geosaıası jaǵdaı men Kaspıı qubyry konsortsıýmyndaǵy apat qazirgi kezde el ekonomıkasyna aıtarlyqtaı teris áser etken joq», - dedi Ǵ. Pirmatov elordada ótken baspasóz máslıhatynda.

Onyń aıtýynsha, tutynýshylyq suranys ta oń qarqyndy kórsetip otyr. Bólshek taýar aınalymynyń, ıaǵnı azyq-túlik pen azyq-túlik ónimine jatpaıtyn taýaraınalymyndaǵy ósim toqtaǵan joq.

«Boljamdarymyzǵa sáıkes, 2022 jyly ekonomıkanyń ósýi 2,8-3,8 paıyz bolady. Bul óz kezeginde jyl sońyna deıin ekonomıkanyń barlyq negizgi salasynda oń dınamıkanyń saqtalýyna qatysty bolyp otyr. Alaıda geosaıası daǵdarys, syrtqy suranystyń nasharlaýy, sondaı-aq taýar jetkizý tizbekterin qaıta qurý jumystary ekonomıkanyń ósý qarqynyn tejeıdi», - dedi UB basshysy.

Onyń paıymynsha, 2023 jyly jalpy ishki ónimniń ósý qarqyny 3,5-4,5 paıyzǵa deıin qarqyn alady. Buǵan syrtqy suranystyń ósýimen qatar, eksporttyq jáne ımporttyq jetkizilim tizbekterin qalpyna keltirý yqpal etedi. Munymen qosa, energııa resýrstaryn óndirý kólemin ulǵaıtý jáne ishki suranystyń artýy ósimge oń áserin tıgizedi.

«2024 jyly naryqtaǵy táýekelderdiń tómendeýi men iri munaı-gaz jobalaryn iske asyrý aıasynda óndirý kóleminiń aıtarlyqtaı ulǵaıýyn eskere otyryp, ekonomıka ósimi jalǵasady», - dedi Ǵalymjan Pirmatov.

Búgingi baspasóz máslıhatynda Ulttyq bank tóraǵasy bazalyq mólsherlemeni 14 paıyz deńgeıinde saqtaýǵa qatysty pikir bildirdi.

Jyldyq mánde ınflıatsııa mamyrda 14 paıyzǵa jetti.

Sonymen qatar Ǵ. Pirmatov osy jyldyń qorytyndysy boıynsha ınflıatsııany 13-15 paıyz deńgeıinde bolýy múmkin ekenin aıtty.