Ulttyq bank tóraǵasy: Zeınetaqy jınaǵy tıimsiz paıdalanylýda dep alańdaýǵa esh negiz joq
Esterińizge sala ketsek, 2 qarasha kúni ótken Májilistiń jalpy otyrysynda depýtat aǵymdaǵy jyldyń 3 toqsanyndaǵy Biryńǵaı jınaqtaýshy zeınetaqy qorynyń zeınetaqy jınaqtarynyń jalpy somasy 7 trl 539 mlrd teńgege jetip, ınvestıtsııalyq taza tabysy 462 mlrd bolǵanyn aıtqan edi. Osylaısha, kiristilik deńgeıi 6,1 paıyzdy quraıdy. Al dál osy kezeńdegi ınflıatsııa 7,1 paıyz boldy. Demek, zeınetaqy jınaǵyna eshqandaı kiris qosylmaǵan degen sóz.
«Bizdiń kózqarasymyzsha, ókinishke oraı ol jerde túrli kezeńdegi sandarǵa arqa súıelgen jáne sol arqyly qoǵamdy adastyryp otyr. Negizinde zeınetaqy aktıvteriniń 9 aıdaǵy kiristiligi keltiriledi de, jyldyq ınflıatsııamen teńestiriledi. Bul durys emes. Qazir men keltirgen derekter zeınataqy aktıvteriniń shynaıy kiristiligi ınflıatsııadan joǵary ekendigin kórsetedi jáne qandaı da bir joldarmen jelinýde nemese tıimsiz paıdalanylýda dep alańdaýǵa esh negiz joq», - dedi Danııar Aqyshev Úkimettiń selektorlyq rejimdegi otyrysynan keıingi brıfıngte.
Ulttyq bank tóraǵasynyń dereginshe, 1 qazandaǵy zeınetaqy aktıvteriniń kólemi shamamen 7,5 trln teńgeni qurady. Salymshylardyń esepshottaryna 462 mlrd teńge kólemindegi ınvestıtsııalyq kiris bólindi. Bul 6,68 paıyzdy quraıdy. Al osy aralyqtaǵy ınflıatsııa kólemi - 4,2 paıyz.
«ıAǵnı, jyl basynan beri oń kiris qamtamasyz etilýde»,- dedi ol.