Ulttyq bank tóraǵasy valıýta naryǵyndaǵy jaǵdaıǵa túsinik berdi

ASTANA. QazAqparat – 2022 jyldyń qorytyndysy boıynsha teńgedegi salymdar 22 paıyzǵa artty. Bul týraly búgin Senattyń jalpy otyrysynda Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Qabyldanǵan belsendi sharalar qarjy júıesiniń turaqsyzdanýyn boldyrmaýǵa jáne teńgedegi aktıvterge degen senimdi saqtaýǵa múmkindik berdi. Valıýta saýdasynyń naryqtyq qaǵıdattaryn keńeıtý, Ulttyq banktiń is-áreketteriniń transparenttiligin arttyrý esebinen valıýta naryǵynyń balansyn jaqsartýǵa múmkin boldy. Byltyrǵy naýryz aıyndaǵy aıyrbas baǵamy 1 AQSh dollary úshin 512 teńgeden joǵary rekordtyq mánge deıin álsiregenine qaramastan, jyl sońyna qaraı 462,7 teńgege deıin 9,7 paıyzǵa nyǵaıdy. Bul turǵyda valıýta naryǵy qalpyna keldi», - Ǵ. Pirmatov.

Onyń aıtýynsha, 2022 jyly Úkimetpen birlesip teńgedegi salymdardy qorǵaý baǵdarlamasy iske asyryldy. Baǵdarlama jeke tulǵalardyń teńgedegi depozıtteri boıynsha ótemaqy tóleýdi eskergen.

«Bólingen ótemaqynyń jalpy somasy 306,6 mlrd teńgeni qurady. Nátıjesinde teńgedegi salymdar 2022 jyldyń qorytyndysy boıynsha 21,2 trln teńgege deıin, ıaǵnı 22 paıyzǵa artty. Al dollardy paıdalaný deńgeıi 31,6 paıyzǵa deıin tómendedi. Bıyl teńgedegi salymdar 21,4 trln teńgege deıin ósti. Depozıttegi dollar deńgeıi 30% mejeden tómendep, 29,3% qurady. Osy oraıda ol keıingi 15 jyldaǵy mınımýmǵa jetti», - dedi UB basshysy.