Ulttyq bank tóraǵasy teńge baǵamyna boljam jasady
ASTANA. QazAqparat - QR Ulttyq bank tóraǵasy Danııar Aqyshev ulttyq valıýtanyń jaǵdaıyna baılanysty boljam jasady, dep habarlaıdy QazAqparat.
«Meniń oıymsha, valıýtalyq naryqtaǵy jaǵdaıda syrtqy ári ishki faktorlardyń yqpaly kórinis tabady. Bul ózgerister reseılik qarjy naryǵynda RF rýbli álsireýiniń oryn alýyna baılanysty sııaqty. Osy oraıda birneshe kún qatarynan rýbldiń álsireýin baıqap otyrmyz. Sáıkesinshe, teńgege de osy faktorlar áser etýde. Degenmen de búginde teńge úshin jaǵdaı óte qolaıly bolyp tur», - dedi UB basshysy Májiliste tilshilerge bergen suhbatynda.
«Birinshiden, munaı baǵasy óte joǵary deńgeıde, ıaǵnı barreline 75 dollarǵa jetti. Ekinshiden, biz jaqyn arada tólem teńgerimi boıynsha málimetterdi jarııalaımyz, onda 2018 jyldyń birinshi toqsanyndaǵy aldyn ala aqparat qamtylady. Bizde ekinshi toqsan qatarynan tólem teńgeriminiń nóldik saldosy baıqalýda. Bul óz kezeginde tólem teńgerimi, sondaı-aq kapıtal aǵyny jáne basqa da baǵyttar elimizde teńdestirilgenin bildiredi», - dep túsindirdi Aqyshev.
Onyń sózine qaraǵanda, qazirgi kezde teńge baǵamynyń qubylýy turǵysynda alańdaýdyń reti joq.
«Sáıkesinshe, aıyrbas baǵamy da teńdestirilgenin aıta alamyz. Bul rette eshqandaı teńgerimsizdik baıqalmaıdy. Osy jaǵdaılarda alańdaýǵa esh negiz joq, sebebi baǵam syrtqy faktorlarǵa baılanysty aýytqyp tur», - dep túıdi Danııar Aqyshev.
