Ulttyq bank tóraǵasy problemaly ıpotekalar týraly máseleniń udaıy kóterilgenin unatpaıdy

Sondyqtan da, ıpoteka máselesin udaıy aıta bergenshe, basqa da salalarǵa nazar aýdarǵan oryndy. Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine Qazaqstan Respýblıkasy Ulttyq Bankiniń qyzmetin uıymdastyrý, qarjy naryǵyn jáne qarjy uıymdaryn retteý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda UB tóraǵasy Grıgorıı Marchenko osylaı málim etti.

«Ipotekalyq problemalarǵa keletin bolsaq, olarmen jalpy respýblıka boıynsha da jekelegen óńirlerde de jumys jasaldy. Bundaı ıpotekashylardyń sany shyndyǵynda birneshe ondaǵan myń adamdy quraıdy. Men bul týraly udaıy aıtyp júrmin taǵy da qaıtalaımyn: bizdiń elimizde zeınetkerlerdiń, múgedekterdiń sany olardan ájeptáýir kóp. Bizdiń oıymyzsha, ekonomıkanyń basqa da salalarynda problemalar jetkilikti. Sondyqtan da, ıpotekalyq problemalardy udaıy kótere bergen durys emes», - dedi UB tóraǵasy.

Onyń aıtýynsha, ıpotekalyq kredıttiń úshten ekisi standartty kredıtter bolyp tabylady. ıAǵnı, bul - ıpotekany alyp, olar ózderi mindetterin oryndaý arqyly tıisti qyzmetin júzege asyryp keledi.

«Jalpy ıpotekashylar qurylymy da ártúrli. Máselen, nesıege úı ǵana satyp alǵandar, basqa eshteńe satyp almaǵandarmen qosa, bir basyna 10-15, tipti 23 páter kredıtke alǵandary da barshylyq. Biz memleket retinde bul adamdardy da qorǵaýymyz kerek pe? Bular negizinen elimizdegi jyljymaly naryqta  4 jyl qatarynan baǵanyń 40-45 paıyzǵa ósýin paıdalanyp, odan tabys tapqysy kelgen alypsatarlar ǵana. Bular osy naryqtan paıda kórgisi keldi, al ondaı tabys tabý sharalary olarda júzege aspaǵan bolsa, onda bul solardyń kásibı qyzmetine baılanysty ǵana problema. Sondyqtan da, men ıpoteka saldarynan obektıvti qıynshylyqtarǵa tap bolǵandardy ǵana qorǵaý kerektigin taǵy da qaıtalaǵym keledi»,- deıdi UB tóraǵasy.