Ulttyq bank tóraǵasy Qazaqstannyń syrtqy qaryzy týraly aıtyp berdi

ASTANA. QazAqparat - Qazaqstan Respýblıkasynyń syrtqy boryshy 2018 jylǵy 1 qańtardaǵy jaǵdaı boıynsha 168 mlrd AQSh dollaryn qurady. Bul týraly Parlament Senatynda tilshilerge Ulttyq bank tóraǵasy Danııar Aqyshev málim etti, dep habarlaıdy QazAqparat tilshisi.

Onyń atap ótýinshe, syrtqy boryshtyń  62 paıyzy fırmaaralyq bereshekke tıesili. Ol negizinen Qazaqstannyń aýmaǵynda munaı-gaz jobalaryn iske asyratyn sheteldik kompanııalar fılıaldarynyń qaryzynan turady.

«Memlekettik sektordyń syrtqy boryshy 8 paıyzdy, memleket baqylaıtyn uıymdardyń úlesi - 16 paıyzdy, jeke sektordyń boryshy  14 paıyzdy quraıdy», -  dep túsindirdi D. Aqyshev.

UB basshysy sońǵy 3 jylda Qazaqstannyń syrtqy boryshy memlekettiń jáne onyń baqylaýyndaǵy uıymdardyń syrtqy boryshynyń, sondaı-aq topishilik qarjylandyrýdyń esebinen 10 mlrd AQSh dollaryna nemese 6% ulǵaıǵanyn aıtyp berdi.  

«Jeke qarjy sektorynyń syrtqy mindettemeleri 4 mlrd AQSh dollaryna nemese 56 paıyzǵa qysqardy», - dep atap ótti D. Aqyshev.

D. Aqyshevtiń sózine qaraǵanda, qazirgi ýaqytta Úkimet memlekettik jáne kvazımemlekettik qaryz alýdy baqylaý kúsheıtilip jatyr. Ulttyq bank óz kezeginde qarjy uıymdarynyń syrtqy boryshyn retteý jumysyn jalǵastyrady.